Azərbaycan Milli Elmlər Akademiyası nəzdində Respublika Seysmoloji Xidmət Mərkəzi ölkədə hiss olunan zəlzələ barədə açıqlama verib.
Bildirilib ki, zəlzələ ötən günlər Ermənistan ərazisində baş verib və Azərbaycanın Gədəbəy, Tovuz və digər həmsərhəd rayonlarında hiss edilib.
Qeyd edək ki, zəlzələnin maqnitudası 4,1 olub, ocağı altı kilometr dərinlikdə yerləşib.
Zəlzələlərin Tədqiqatı Bürosunun məlumatına əsasən, Tovuz stansiyasından 39 km cənub-qərbdə, Ermənistan ərazisində qeydə alınan zəlzələ Azərbaycanın sərhəd rayonlarında üç bala qədər hiss olunub.
Sual yaranır ki, zəlzələnin Azərbaycanda baş vermə ehtimalı və davamlı olub-olmaması nə qədər həqiqətə yaxındır ?
Mövzu ilə bağlı “Sherg.az”a açıqlama verən AMEA Coğrafiya İnstitutunun şöbə müdiri, aqrar üzrə fəlsəfə doktoru Ənvər Əliyev bildirib ki, zəlzələ məkanı, zamanı bilinməyən hadisədir:
“Heç bir narahatçılığa gərək yoxdur. 3 bal əslində zəlzələ sayıla biləcək qədər güclü rəqəm deyil. Dağlıq zonalarda hiss olunub”.
Seysmoloq qeyd edib ki, təkanların ölkəmiz üçün heç bir qorxusu yoxdur:
“Elə bir zonada yaşayırıq ki, 3 ballıq təkanlar normal sayılır. Güclü olsa idi əhali tərəfindən hiss olunardı. Sadəcə müəyyən cihazlar tərəfindən ölçülüb, qeydə alınıb”.
Səbinə Elmanqızı
