Azərbaycanda siqaretin topdansatışı ilə məşğul olan firmalar satışı dayandırıb. Sahibkarların dediyinə görə, siqaretlərin nağdsız satışına keçildikdən sonra firmalar topdansatışı, demək olar ki, məhdudlaşdırıb.
Topdansatış firmaları artıq bir aya yaxındır ki, xırda sahibkarları siqaretlə təmin etmir. Sahibkarlar məcbur qalıb, müxtəlif yollarla "qara bazar”dan siqaret alırlar. Xüsusilə kiçik marketlər vəziyyətdən istifadə edib tütün məhsullarını süni şəkildə bahalaşdırıblar.
İqtisadçı-ekspert, jurnalist Elçin Bayramlının sözlərinə görə, siqaret idxal olunduğuna görə qiyməti manatın xarici valyutalara qarşı məzənnəsi ilə dəyişir:
"Bu da normal haldı. Əsas problem odur ki, manat ucuzlaşanda siqaretin qiyməti qalxır, amma bahalaşanda düşmür. Güman edirəm ki, bu onunla bağlıdır ki, manat nisbətən ucuz olanda alınmış partiyalar həmin qiymətlə satılmalıdır, yeni partiyalar gələndə qiymət ucuzlaşmalıdır. Bu isə bir neçə gün çəkə bilər”.
Siqaret qıtlığına gəldikdə isə E.Bayramlı hesab edir ki, əksər kiçik dükanlarda siqaret yoxdur. Satıcılar bunu tütün məmulatlarının topdansatışının kartla olması ilə izah edirlər.
Həmkarımız bu prosesin uzun müddət davam edəcəyini də istisna etmir:
"Satıcılar kart vasitəsilə ödənişin onlara sərf etmədiyini deyir: "Çünki bank əlavə vergi tutur. Onsuz da siqaretdən 3-5 qəpik qalır, bizə lazım deyil, heç satmarıq”. Mənim fikrimcə, kart sistemi ilə ödəniş yaxşıdır, amma əlavə bank tərəfindən əlavə vergi tutulmasa. Heç bir satıcını zorla siqaret satmağa məcbur etmək olmaz”.
E.Bayramlının sözlərinə görə, bundan sonra kiçik dükanlar siqaret satmaqdan imtina edəcək, daha çox ancaq iri mağazalarda satılacaq. Bu da alıcılar üçün əlavə problem yaradacaq.
Şəymən
