"Rusiyanın Türkiyədəki səfiri Andrey Karlovun Ankarada sərgidə çıxışı zamanı qətlə yetirilməsi terror aktıdır".
Bunu Sherg.az politoloq Zərdüşt Əlizadə deyib.
Ekspertin sözlərinə görə, böyük əks -səda doğurduğu üçün dünyada həmişə diplomatlar qətllərin hədəfində olublar:
"Vaxtilə İran diplomatlarını öldürüblər, İsrail diplomatlarına qarşı sui-qəsd təşkil ediblər. Beynəlxalq aləmdə hansısa bir ölkə hədəfə çevrilirsə, ilk növbədə onun diplomatını qətlə yetirirlər. Rusiya da yürütdüyü siyasətə görə, böyük tənqid obyektinə çevrilib. Moskva- Ankara münasibətlərini pozmaq, Rusiyaya hansısa mesaj vermək üçün hörmətli bir səfiri hədəf seçib, qətlə yetiriblər. Həmçinin Rusiya -Türkiyə münasibətlərinin normal inkişafına maneə olmağa çalışırlar. Qisas alırlar. Özlərinin mövcudluğunu bildirmək istəyirlər. Ümumiyyətlə, terror aktının məqsədi dünyanı qorxutmaq olub".
Ekspert düşünmür ki, məhz bu terror hadisəsinə görə rəsmi Moskva rəsmi Ankaraya olan münasibətini dəyişsin:
"Belə bir şey olmayacaq. Rusiya- Türkiyə münasibətləri olduğu kimi davam edəcək. Bu iki ölkənin həmin terroru sifariş edən ölkələrə ən tutarlı cavabı o olacaq ki, onlar siyasətlərini dəyişməyəcəklər. Ankara və Moskvadan siyasətlərini dəyişməyi tələb edirlər. Qətllərin səbəbi də budur. Onlar isə siyasətlərini dəyişmirlər".
"Bu sui-qəsd III dünya müharibəsinə yol açacaq" iddiasına gəlincə, Z.Əlizadə bəyan edib ki, bu, baş verməyəcək :"Lokal müharibələr davam edəcək, Amma III dünya müharibəsi olmayacaq".
Ayyət Əhməd
