Türkiyə Avropa Şurasının qadınlara münasibətdə zorakılığa və ailədə zorakılıqla mübarizəyə dair İstanbul Konvensiyasından çıxıb.
APA-nın Türkiyə bürosunun xəbərinə görə, Türkiyə Prezidenti Rəcəb Tayyib Ərdoğanın bununla bağlı sərəncamı “Resmi Gazete”də dərc olunub.
Qeyd edək ki, İstanbul Konvensiyası 11 may 2011-ci ildə Avropa Şurasına üzv 8 dövlət tərəfindən imzalanıb. Türkiyə 10 may 2012-ci ildə konvensiyanı ratifikasiya edən ilk dövlət olub. Daha sonra 33 dövlət sənədi ratifikasiya edib.
Ancaq son dövrlər gender məsələsi ilə əlaqədar sənədlə bağlı tənqidlər səsləndirilib.
Türkiyə Vitse-prezidenti Fuad Oktay bildirib ki, ölkədə qadınların hüquqlarının müdafiəsi davam edəcək: “Bizim milli dəyərlərimiz qorunmaqla Türk qadınını durumunun cəmiyyətimizdə layiq olduğu vəziyyətə çatması üçün mübarizəmiz davam edəcək. Xaricdən bunun üçün çarə axtarmağa ehtiyac yoxdur. Məsələnin həlli milli adət və ənələrimizdədir”.
