"Media könüllüləri -145" layihəsi çərçivəsində Yeni Media ilə bağlı onlayn təlimlər başa çatıb.
"Sherg.az" xəbər verir ki, təlimlərdə 20 dövlət qurumu və 20 media qurumunda SMM işini həyata keçirənlər, eyni zamanda BDU – nun Jurnalistika fakültəsinin tələbələri iştirak edib.
3 gün davam edən təlimlərdə Dr.Öğr.Üyəsi. Özləm Tuğçə Kələş “Yeni media ve Rəqəmsal Media Planlama” barədə, Dr.Öğr.Üyəsi. Zəliha Ocak “Yeni media ve Jurnalistikanın Dəyişimi”nə dair, Dr.Öğr.Üyəsi Yəlda Şənkal isə “İctimaiyyətlə əlaqələr və media (dəyişim/dönüşüm)" mövzusunda seminar verib.
Son seminarda Jurnalistlər Birliyinin sədri, layihə rəhbəri Elşad Eyvazlı ilə yanaşı, Nişantaşı Universitetinin prorektoru Sibel Baykut, "Qlobal Jurnalistlər Şurası"nın rəhbəri Mehmet Ali Dim də iştirak edib.
Əvvəlcə Elşad Eyvazlı iştirakçıları salamlayaraq təlimin əhəmiyyətini vurğulayıb və sözü Dr.Öğr.Üyəsi Yəlda Şənkala verib. Daha sonra
"Qlobal Jurnalistlər Şurası"nın rəhbəri Mehmet Ali Dim çıxış edib. O, iştirak edən hər kəsə təşəkkürünü bildirib və qatılanları sertifikatla təmin edəcəklərini deyib.
Ardınca fikirlərini bölüşən Nişantaşı Universitetinin prorektoru Sibel Baykut keçirilən təlimləri dəyərləndirib. S. Baykut "bir millət, iki dövlət" olduğumuzu vurğulayaraq bu sahədə görüləcək işlərə daim dəstək verəcəyini açıqlayıb.
İştirakçılar keçirilən hər 3 seminardan razı qalıb və məmnuniyyətlərini bildiriblər.
Qeyd edək ki, "Media Könüllüləri Təşkilatı”nın (MKT) ilk üzvləri başlanğıcda Milli Mətbuatın yaranmasının 145 illiyinə uyğun olaraq, 145 nəfər (tələbə-könüllü) təşkil edir. Layihənin ideya müəllifi və icraçısı təşkilatın üzvü, ASAN Radionun Baş redaktoru İlkin Kərimovdur. Bakı Dövlət Universiteti Jurnalistika fakültəsi ilə birgə icra olunan bu layihədə universitet tərəfindən kurator Jurnalistika fakültəsinin Sosial məsələlər və tələbələrlə iş üzrə dekan müavini Samir Mirzəyevdir.
