Azərbaycan Respublikası Prezidentinin "Heyvan kəsimi fəaliyyətinin tənzimlənməsi haqqında" müvafiq Sərəncamının icrası məqsədilə müasir tələblərə uyğun heyvan kəsimi məntəqələrinin yaradılması, baytarlıq-sanitariya normalarına cavab verməyən yerlərdə heyvan kəsimi hallarının qarşısının alınması istiqamətində Azərbaycan Qida Təhlükəsizliyi Agentliyi (AQTA) aidiyyəti dövlət qurumları ilə birgə tədbirlərini davam etdirir.
Bu barədə AQTA məlumat yayıb.
Bildirilib ki, agentlik fəaliyyətə başladığı dövrdə ölkə üzrə müasir baytarlıq-sanitariya tələblərinə uyğun kəsim məntəqələrinin sayı 15 olsa da, müvafiq qurumlarla birgə görülmüş işlər nəticəsində bu rəqəm hazırda 102-yə çatdırılıb.
"Təəssüflə qeyd etməliyik ki, hələ də ölkənin bəzi rayonlarında, o cümlədən İmişli, Beyləqan, Saatlı, Sabirabad və bir sıra digər rayonlarda qanuni heyvan kəsimi məntəqələrinin təşkili istiqamətində gecikmələr mövcuddur. Bu rayonlarda heyvandarlıq sahəsinin inkişaf etməsinə baxmayaraq, qanuni heyvan kəsimi məntəqələrinin mövcud olmaması heyvan sağlamlığının izlənilməsi və biotəhlükəsizliyin təmin olunması istiqamətində maneələr yaradır.
Bununla bağlı agentlik bu sahədə fəaliyyət göstərən sahibkarları həmin ərazilərdə qanunvericiliyə uyğun yerli heyvan kəsimi məntəqələrinin yaradılmasını təşviq edir", - deyə məlumatda bildirilib.
Həmçinin qeyd olunub ki, sahibkarlar heyvan kəsimi məntəqələri yaratmaq üçün rayon icra hakimiyyətlərinə, mütəxəssislər tərəfindən metodiki köməklik və baytarlıq-sanitariya normaları ilə bağlı məlumatlar əldə etmək üçün AQTA-nın regional bölmələrinə müraciət edə bilərlər.
Azad İstehlakçılar Birliyinin rəhbəri Eyyub Hüseynov "Sherg.az"a bildirib ki, heyvan kəsimi məntəqələrinin standartı var:
“ Sözügedən standart artıq neçə ildir ki, tətbiq edilir. Həmçinin həmin standartın həcmi, isti və soyuq su ilə təmin olunmasına görə çoxsaylı tələblər mövcuddur. Neçə ildir AQTA istəyir ki, bunu tətbiq etsin. Hər rayonda belə məntəqələr var. Bu işə cavabdeh şəxslərdən biri də rayon İcra hakimiyyətləridir. Lakin bu geniş vüsət almayıb. Ümumiyyətlə, bir çox ölkələrdə hətta şəxsin saxladığı heyvan olsa belə onun ev şəraitində kəsilməsinə icazə yoxdur. Yəni bütün hallarda heyvanlar təşkil olunmuş yerlərdə kəsilməlidir. AQTA da bu hədəflərə çatmaq istəyir. Çünki bu çox əhəmiyyətli bir məsələdir. Həmçinin sözügedən hədəflərə çatmaq əhalinin bir sıra xəstəliklərdən qoruya və təhlükəli heyvan xəstəliklərinin insanlara keçməsinin qarşısını ala bilər. Lakin polis və İcra hakimiyyəti nümayəndələri nə qədər mübarizə aparsa da, bu hədəflərə çata bilmir. AQTA-nın çağırışına ictimai dəstək verilməli, kömək edilməlidir ki, bu məsələ həll olunsun. Yəni heyvanlar təşkil olunmuş məntəqələrdə stressiz bir vəziyyətdə kəsilsin. Ümumiyyətlə heyvan dünyaya gələndə kompüter bazasına daxil edilməli, qulağına xüsusi sırğa vurulmalı və orada nömrə olmalıdır. Eyniu zamanda heyvana vurulan baytarlıq dərmanları hamısı vaxtaşırı bazada qeyd edilməlidir. Heyvan kəsiləndə isə o bazadan silinməlidir. Çox təəssüf ki, AQTA hələ bu hədəflərdən çox uzaqdadır. Ümumiyyətlə heyvanlar məntəqələrdə kəsildikdən sonra əmtəə bazarında və marketlərdə satılan heyvan ətləri paketlənəcək. Həmçinin üzərində buraxılma tarixi, son yararlıq müddəti və hansı təsərrüfatda kəsildiyi göstəriləcək”.
