Nəqliyyat vasitələri üçün verilən dövlət qeydiyyat nişanında əks olunan rəqəmlərin və ya hərflərin kombinasiyası hər zaman insanların diqqət mərkəzində olub.
Belə ki, ölkəmizdə də yeni avtomobil alan şəxs arzuladığı nəqliyyat vasitəsinə sahib olduqdan sonra bir də bunun üzərinə zövqünü oxşayacaq avtomobil qeydiyyat nişanını seçməyə çalışır. Belə olan halda, nəqliyyat vasitəsinin sahibi arzuladığı qeydiyyat nişanına sahib olmaq üçün büdcəsindən istənilən məbləğdə maddi vəsait belə xərcləməyə xəsislik etmir. Bu zaman avtomobil qeydiyyat nişanına ayrılan vəsait, hətta yeni avtomobil qiymətinə belə başa gəlir.
Qeydiyyat nömrə nişanlarının satıldığı saytlar var ki, burada qiymətlər dodaq uçuqladır.
Maşın qiymətinə olan bu nömrələrin satışı bəs qanunidirmi?
Avtosfer.az saytının baş redaktoru, nəqliyyat eksperti Elməddin Muradlı "Sherg.az”a bildirib ki, dünyanın bir çox ölkələrində nəqliyyat vasitələri üçün verilən dövlət qeydiyyat nişanında əks olunan rəqəmlərin və ya hərflərin önəmi dəb halını alıb:
“İnsanlar öz adlarına, təvəllüdlərinə və yaxud özəl günlərinə aid nömrə və rəqəm seçirlər. Azərbaycanda da belə hallar var. Lakin dövlət rüsumu haqqına görə nömrələrin satış qiyməti 1000 manatdan 3000 manata qədərdir. İndi əlli və ya yüz manata nömrə satanların isə yəqin əvvəl aldıqları nömrələridir. Digər tərəfdən bəzən dələduzluq halları olur. Yəni nömrə satıram deyərək vətəndaşın kartından pul çəkirlər. Hətta yol polisi vasitəsi ilə satışa qoyulan nömrələrin sahibinə müraciət etmişik və xəbərsiz olduqlarını bildiriblər. Bu kimi hallar tez-tez müşahidə edilir. İnsanlar daha diqqətli olmalıdırlar. Rəsmi qayda da müraciət edib Yol polisindən dövlət qeydiyyat nişanı alsalar daha yaxşı olar”.
