Cəmiyyətdə peşə təhsilinə marağı daha da artırmaq üçün təbliğata ehtiyac var
"Araşdırma aparmalıyıq ki, bizə gələcəkdə hansı peşələr üzrə daha çox və hansı sayda mütəxəssis lazım olacaq". Bunu Milli Məclisin Elm və təhsil komitəsinin iclasında "Təhsil haqqında” qanuna təklif edilən dəyişikliyin müzakirəsi zamanı deputat Ceyhun Məmmədov deyib. Deputat bildirib ki, qanun layihəsi Prezident İlham Əliyevin keçmiş qaçqın və məcburi köçkünlərə növbəti diqqət və qayğısıdır: "Bu dəyişiklik əhalinin gələcəkdə məskunlaşmasına da ciddi təsir göstərəcək. İki məqam önəmlidir. Birinci, araşdırma aparmalıyıq ki, bizə gələcəkdə hansı peşə üzrə daha çox və hansı sayda mütəxəssis lazım olacaq, ona da uyğun ixtisasları müəyyən etməliyik. İkinci, bu gün həmin ərazilərdə yeni müəssisələr yaradılır, onlarla təhsilverənlər arasında sıx əməkdaşlıq olmalıdır. Bu, həm də geri qayıdan vətəndaşların işlə təmini baxımından xüsusi əhəmiyyət daşıyır. Cəmiyyətdə peşə təhsilinə marağı daha da artırmaq üçün təbliğata ehtiyac var. Əgər bu istiqamətdə ciddi iş getməsə, gələcəkdə bir sıra sahələr üzrə mütəxəssislərin tapılmasında çətinliklər yarana bilər”.
Deputat Elnarə Akimova deyib ki, orta məktəblərdə peşə təhsilinə marağı olan şagirdlər var, onların da təhsilinə diqqəti artırmaq lazımdır. O bildirib ki, onların gələcəkdə məvacib, iş yerləri ilə təmin olunma ilə bağlı narahatlıqları var: “Peşə təhsilini ümumiyyətlə, pulsuz etmək çox yaxşı olardı. Bu imkanı yalnız Qarabağda sosial baxımdan imkansız şəxslərə deyil, ümumiyyətlə, peşə təhsili almaq istəyən hər kəsə yaratmaq lazımdır. Belə bir addım gənclərə böyük stimul olar. Ümidli gəncliyin olması ümidli gələcəyin qurulması deməkdir. Ümumilikdə, Qayıdışı bütün yönləri ilə stimullaşdırmaq üçün bu qanun atılmış ən mühüm addımlardan biridir, qayıdış prosesinin bütün istiqamətlərdə təmin olunması deməkdir. İnanıram ki, bu qanun peşə təhsilinin funksionallıq qazanmasına, peşə məktəblərinin bütün bölgələrimizdə bərpasına stimul olacaq”.
Deputat Fatma Yıldırım qeyd edib ki, bu gün dövlətimizin əsas siyasəti işğaldan azad olunmuş əraziləri yenidən qurmaqdır: “Kənd və şəhərlərimiz yerlə yeksan olmuşdu. Görülən işlər isə dünyaya mesajdır ki, biz qayıtmışıq. Təhsil də burada önəmli sahələrdən biridir. Peşə təhsilinə yalnız gənclər yox, orta yaşlı insanlar da üz tuturlar. Artıq əmək bazarında özünü təsdiq etmiş şirkətlər normativlərində ixtisas sənədi tələb edir. Ona görə də artıq insanlar başa düşür ki, peşə təhsili müəssisələrinə getməlidirlər. Bu gün Qarabağ və Şərqi Zəngəzur bölgəsi böyük inşaat ərazisi sayılır. Oradakı müəssisələr də bu peşə məktəbində təhsil almış, məzun olmuş şəxsləri işlə təmin etməlidir. Məsələn, 2021-ci ildə Bərdədə açılan peşə məktəbi müasir standartlara cavab verir. İnsanlar Bərdədə peşə məktəbini oxuyur, müvəffəqiyyətlə bitirir, amma hara müraciət etməlidirlər? Dövlət Məşğulluq Agentliyinin nümayəndələri bildirir ki, çoxlu vakansiyalar var. Mən belə millət vəkili olaraq müraciət edəndə deyirlər ki, orada məskunlaşmış insanlara üstünlük veririk. Tək təhsil verməklə iş bitmir, təhsil almış insanlar işlə bağlı zəmanəti, gələcəklərini görmək istəyirlər”.
