Sözügedən çətinliklərə görə velosiped sürənlərin sayı azdır
Bakıda mikromobillik infrastrukturunun inkişaf etdirilməsi üçün həyata keçirilən layihə çərçivəsində velosiped zolaqları ayrılmış yolların sayı artır.
Bu addım bəzi sürücülərin narazılığına səbəb olur.
Narazılığa rəvac verən əsas iddia budur ki, bəzən saatlarla bu zolaqdan velosiped sürən şəxs keçmir, insanların üstünlük vermədikləri bu nəqliyyat vasitəsi üçün ayrıca zolaqların yaradılması tıxacların daha da artmasına gətirib çıxarır.
Nəqliyyat məsələləri üzrə ekspert Yasin Mustafayev “Sherg.az”a bildirib ki, velosiped bizim relyef şəraitində səmərəli deyil:
“Yollarda bəzi sərt yoxuşlar velosipedlərə çətinliklər yaradır. Düşünürəm ki, sözügedən çətinliklərə görə velosiped sürənlərin sayı azdır. Buna baxmayaraq hibrid velosipedlər daha məqsədəuyğundur. Həmçinin skuterlərdən də daha çox istifadə olunur. Çünki o daha rahatdır. Yəni yığıb maşına qoymaq, və yoxuşlarda istifadə etmək daha güclüdür. Hazırda keçid dövrü yaşayırıq. İnsanların çoxusu başa düşmür ki, fərdi nəqliyyat vasitəsindən daha çox istifadə etməliyik. Tıxacın qarşısını ictimai və xırda nəqliyyat vasitələri ilə ala bilərik. Artıq insanların 30-40 faizi ya velosiped ya da ki, skuter alır. Bu hal çox sevindiricidir və düşünürəm ki, gələcəkdə kütləvi hal alacaq”.
