Paytaxt ərazisindəki bütün parklanmalarda demək olar ki, ilk 15 dəqiqə ödənişsiz həyata keçirilir. Yəni sürücü öz avtomobilini ilk 15 dəqiqə pulsuz şəkildə həmin ərazidə park edə bilər. Lakin "Qış parkı"ndakı yeraltı parklanmada mənzərə tamam fərqlidir. Burada avtomobil içəri daxil olduqdan sonra qiymət hesablanmağa başlayır.
Məsələ ilə bağlı parklanmalara nəzarət edən Azərbaycan Yerüstü Nəqliyyat Agentliyinin (AYNA) mətbuat katibi Tural Orucov bildirib ki, ödənişli parklanma yerlərində nəqliyyat vasitələrinin 15 dəqiqəyədək parklanması üçün ödənişin tələb olunmaması dövlət avtomobil yollarının kənarında təşkil edilən parklanma yerlərinə şamil edilir.
Qeyd edək ki, "Yol hərəkəti haqqında" qanunun 53-cü maddəsinin 15-ci hissəsinə edilən dəyişikliyə əsasən, ödənişli parklanmalarda ilk 15 dəqiqə ödənişsizdir.
Nəqliyyat eksperti Aslan Əsədov "Sherg.az"a bildirib ki, şəhərin mərkəzi hissələri bir necə ərazi vahidliyinə bölünür:
''Burada isə parkinq qiymətləri Tarif Şurası tərəfindən standart şəkildə təyin olunur. "Yol hərəkəti haqqında" qanuna əsasən, parkinq xidmətinin ilk 15 dəqiqəsi pulsuzdur. Həmin vaxt ərzində insanlar vacib olan ehtiyaclarını ödəyə bilərlər. Məsələn, həmin müddətdə aptekdən dərman və ya marketdən hansısa məhsulu almaq mümkündür. Doğrudur, 15 dəqiqə çox azdır. Lakin hər bir halda parkinqdən pulsuz istifadə imkanı yaradılıb. "Qış parkı"-ndakı mənzərəyə gəlincə isə bura şəhərin mərkəzi hissələrindən biridir. Orada hər hansı qayda pozuntusuna görə, məsuliyyəti ərazinin tabeliyində olan aidiyatı qurum daşıyır. Təbii ki, Nazirlər kabinetinin qərarı hər bir əraziyə aiddir. Ona görə də qaydalara qeyd-şərtsiz əməl etmək lazımdır".
