Ermənilər Moskvaya “yox” dedi, Rusiyanın adamları seçkidə şanssızdır
Rusiya Ermənistanda gələn il parlament seçkisinə qədər Baş nazir Nikol Paşinyanın mövqelərini zəiflətməyə, imkan daxilində onu devirməyə çalışır. Nikol Paşinyan bundan xəbərdar olduğuna görə hər hökumətinə təhdid saydığı qüvvələrə qarşı radikal addımlar atır, müxalifət təmsilçilərini, Rusiyaya bağlı keşişləri və iş adamlarını həbs edir. Ancaq hadisələr Paşinyanın nəzarətindən çıxa da bilər. Təsadüfi deyil ki, Rusiyanın Gümrüdəki hərbi bazasını gücləndirməsi barədə xəbərlər çoxalıb. "Hraparak" qəzeti öz mənbələrinə istinadən yazır ki, hər gün bazaya hərbi yükün olduğu bir neçə təyyarə enir. Tədarüklərin məqsədi məlum deyil, lakin müxtəlif fərziyyələr irəli sürülür. Versiyalardan birinə görə, Moskva bununla regionda mümkün dəyişikliklərə hazırlaşır. Qəzet, həmçinin qeyd edir ki, Ermənistan hakimiyyəti baş verənlərdən xəbərdardır, lakin vəziyyəti açıq şəkildə şərh etmir.
Siyasi şərhçi Həsrət Rüstəmov deyib ki, Ermənistanda Rusiyanın adamlarının birmənalı olaraq seçkidə qalib gəlmək şansları yoxdur. Onun fikrincə, bu, artıq danılması mümkün olmayan reallıqdır:
"Erməni toplumu Moskvanın təsirində olan istənilən siyasi personaya güvənmir. İstər keçmiş korrupsioner olsun, istər gənc biznesmen və ya Kilsə xadimi, ermənilər onlara artıq etimad etmir. Düzdür, Paşinyanın da reytinqi və siyasi vəziyyəti müsbət xarakterizə edilmir. Ancaq hazırkı rəqiblərinə münasibətdə seçkidə baş nazirin qalib gələcəyini indidən ehtimal etmək çətin deyil. Əlbəttə, Paşinyanın seçkiyə kimi devrilməsi mümkündür. Ancaq Rusiya əvvəlki ölkə deyil və regiondakı vəziyyətə ən azından təkbaşına müdaxilə imkanları çox məhduddur. Ukrayna ilə müharibə Rusiyanın qəti addım atmasına mane olur. Bir sözlə, rus təsirindən qurtulmaq istəyən ermənilər və Rusiyanı Qafqazdan sıxışdırmaq istəyən ABŞ və digərləri möhkəm dursalar, Paşinyan hələ bir dönəm hakimiyyətdə qalacaq. Əslində, bu təkcə İrəvan üçün deyil, bütün bölgə üçün də əhəmiyyətli məsələdir".
