İrəvan Bakı ilə dərhal sülh sazişi imzalamağa hazırdır. Bu barədə Ermənistan xarici işlər naziri Ararat Mirzoyan Lüksemburqda bildirib. Ermənistan XİN rəhbəri qeyd edib ki, İrəvan Bakı ilə sülh sazişinə imza atmağa və ratifikasiya etməyə hazırdır. Bir neçə gün öncə jurnalistlərə açıqlamasında Azərbaycan xarici işlər naziri Ceyhun Bayramov demişdi ki, Ermənistanla sülh prosesində bir neçə istiqamət üzrə təmaslar davam edir. Nazir Ermənistan-Azərbaycan normallaşma prosesində ciddi addımların olmadığını vurğulayıb: "Hazırda Ermənistan tərəfindən Azərbaycanın gözləntiləri var. Bu, ərazi iddialarından imtina və ATƏT-in Minsk qrupunun ləğv edilməsidir. Bu prosesləri izləyirik. Təmaslar var, amma ciddi addımlar hələ ki, yoxdur". Görünən odur ki, Azərbaycanla Ermənistan arasında sülh müqaviləsi mətni üzrə tam razılıq əldə olunduqdan sonra prosesdə müəyyən qədər durğunluq müşahidə edilir.
Politoloq İlqar Vəlizadə deyib ki, Ermənistan tərəfi Azərbaycanın haqlı tələblərinin yerinə yetirilməsi üçün kifayət qədər səy göstərmir. Ekspertin qənaətincə, İrəvan hökuməti sülh istiqamətində ciddi addımlar atmır:
"Azərbaycan və Ermənistan tərəfləri rəsmi açıqlamalarda sülh danışıqlarının davam etdiyini, dayanmadığını bildirirlər. Lakin İrəvan və Bakının rəsmi bəyanlarından da göründüyü kimi belə gedişlə sülh müzakirələrində konkret nəticə gözləmək mənasızdır. Ən azından yaxın dönəmdə danışıqlarda ciddi irəliləyişin olacağını iddia etmək inandırıcı deyil. Tərəflərin danışıqları sanki növbəti müstəviyə keçid etməkdədir. Bəllidir ki, hazırda dünyada, regionda başqa məsələlər daha çox aktuallaşıb. Bəlkə də ona görə, tərəflər sülh sazişinin imzalanması çərçivəsində aparılan danışıqların intensivliyini azalda bilərlər".
