"COP tarixində ilk dəfədir ki, turizm COP gündəliyinə inteqrasiya olunur. Bu an tarixi bir hadisədir, çünki turizm iqlimlə bağlı qlobal söhbətin mərkəzində öz layiqli yerini tutur".
APA xəbər verir ki, bunu COP29 çərçivəsində Turizm sektorunda Təkmilləşdirilmiş İqlim Fəaliyyəti üzrə Nazirlərin Birinci Görüşündə Dövlət Turizm Agentliyinin (DTA) sədri Fuad Nağıyev deyib.
“COP29-a ev sahibliyi edən ölkə kimi Azərbaycan bütün sektorlar üzrə iqlimlə bağlı tədbirləri irəlilətməyə dərindən sadiqdir. Bu gün biz iqlim dəyişikliyi ilə mübarizədə turizmin həlledici rolunu müzakirə etmək üçün dünyanın hər yerindən nazirləri, liderləri və maraqlı tərəfləri bir araya gətirməkdən şərəf duyuruq", - deyə o söyləyib.
Fuad Nağıyev bildirib ki, qlobal turistlərin sayı artmağa davam edərkən, tədbirlər görmədikcə sektordan emissiyaların artacağı proqnozlaşdırılır:
"Bugünkü turizm nazirləri tədbiri turizm sektorunda əməkdaşlıq və fəaliyyət istiqamətində zəmin yaratmaq üçün bir fürsət kimi xidmət edir. Turizmin COP29 gündəliyinə daxil edilməsi sektor üçün dönüş nöqtəsidir. Bu, milli hökumətlərin, özəl sektorun və vətəndaş cəmiyyətinin transformativ dəyişikliyi təmin etmək üçün birlikdə işləməyə çağırışıdır. Azərbaycan COP29-un ev sahibi kimi bu mühüm dialoqa rəhbərlik etməkdən qürur duyur. Biz qlobal miqyasda davamlı turizmi inkişaf etdirmək üçün səylərimizi gücləndirməyə və hamınızla işləməyə sadiqik”.
