Növbəti 5-7 il ərzində şəhər əhalisinin 500 milyondan çox artması gözlənilir ki, bu da öz növbəsində şəhər infrastrukturuna, o cümlədən elektrik və su təchizatına, nəqliyyata, kanalizasiya sistemlərinə, yollara, ümumilikdə infrastruktura daha böyük təzyiq göstərəcək.
APA xəbər verir ki, bunu COP29-da çoxsəviyyəli və çoxsektorlu iqlim fəaliyyəti üzrə yüksək səviyyəli açılışda çıxış edən COP29 prezidenti Muxtar Babayev deyib.
O bildirib ki, şəhər mərkəzləri, əsasən nəqliyyat, sənaye və binalar qlobal CO2 emissiyalarının 70%-dən çoxunu təşkil edir.
2050-ci ilə qədər dəniz səviyyəsindən aşağıda olan şəhərlərdə və məskunlaşma yerlərində yaşayan milyarddan çox insan dəniz səviyyəsinin yüksəlməsi riski ilə üzləşəcək. Bu baxımdan şəhərlər və regionlar, onların unikal və spesifik kontekstinə uyğunlaşdırılmış iqlim həllərini həyata keçirmək üçün alətlərə, vəsaitlərə və səlahiyyətə ehtiyac duyur.
“Ona görə də Baku-Urban Davamlılıq Koalisiyası kimi təşəbbüslər çox vacibdir, çünki onlar əməkdaşlığı artırmaq üçün müxtəlif tərəfləri bir araya gətirir. Şəhər iqlim maliyyəsi də kritik bir məsələdir. Şəhər infrastrukturuna, enerji səmərəli binalara və davamlı nəqliyyat sistemlərinə investisiyaların yoxlanılması innovativ maliyyələşdirmə mexanizmlərini və daha güclü tərəfdaşlıqları tələb edir. Bu, yalnız iqlim risklərinin həlli ilə bağlı deyil, həm də iqtisadi artım üçün imkanların açılması, iş yerlərinin yaradılması və şəhər əhalisi üçün həyat keyfiyyətinin yaxşılaşdırılması ilə bağlıdır”- Muxtar Babayev əlavə edib.
