Əksinə, Çin Rusiya ilə birgə ABŞ və Böyük Britaniyanın Yəməndə husilərin mövqelərinə zərbə endirmələrindən narazıdır
Böyük Britaniya və ABŞ silahlı qüvvələri Yəməndə husilərin obyektlərinə iki yeni zərbə endirib. Bildirilib ki, Əl-Hodeyda əyalətindəki Əl-Cabban ərazisi və Ras İsa limanı hücuma məruz qalıb. Vaşinqton və London hesab edir ki, bu zərbələrdən sonra husilər ticarət gəmilərinə hücumlardan imtina edəcəklər. Ancaq görünən odur ki, ABŞ və Böyük Britanıyanın Yəməndə husilərin mövqelərinə zərbələri nəticəsiz qalır, çünki husilər də öz hücumlarını durdurmurlar. Böyük Britaniyanın xarici işlər naziri Devid Kemeron Münhen Təhlükəsizlik Konfransında Çinin xarici işlər naziri Van Yi ilə görüşdə Pekinin Tehrana təsir etməsini istəyib. Yəni Pekin Tehrana, İran hakimiyyəti isə husilərə təsir etməlidir ki, Qırmızı dənizdə ticarət gərmilərinə hücumlar dayandırılsın.
"Atlas" Araşdırmalar Mərkəzinin rəhbəri Elxan Şahinoğlu "Sherg.az"a deyib ki, təkliflərə baxmayaraq, Pekin Tehrana təsir etmək fikrində deyil. Əksinə, Çin Rusiya ilə birgə ABŞ və Böyük Britaniyanın Yəməndə husilərin mövqelərinə zərbə endirmələrindən narazıdır:
"Rusiya və Çinin BMT-dəki nümayəndələri çıxışlarında Təhlükəsizlik Şurasının Yəmənə qarşı hərbi hücumlara icazə vermədiyini xatırladıblar. Vaşinqtonun və Londonun mövqeyi dəyişməzdir. Husilərin durdurulması üçün bütün imkanlardan istifadə olunmalıdır. Vaşinqton və London Moskva və Pekinin istədiyi kimi bu məsələni BMT Təhlükəsizlik Şurasının müzakirəsinə çıxarmaq istəmir. Çünki Rusiya və Çin Təhlükəsizlik Şurasında səsvermədə husilərə qarşı güc tətbiqinə veto qoyacaqlar. ABŞ rəsmiləri İranın 2014-cü ildən başlayaraq husiləri raketlərlə təchiz etdiyini bildiriblər. Husilər ticarət gəmilərinə bu raketlərlə zərbələr endirir. Buna görə Vaşinqton hesab edir ki, husiləri durdurmağın yollarından biri Tehrana təsir göstərməkdir. Tehranın husilərə təsir etmək fikri isə yoxdur. Halbuki Qırmız dənizdə gərgin vəziyyət İranın ticarət tərəfdaşlarına da zərər verir. Bir çox ölkənin ticarət gəmisi Qırmızı dəniz və Süveyş kanalından istifadə etmək istəmir. Bu da həmin gəmilərin daha uzun məsafə seçməsi ilə nəticələnir. Nəticədə yanacağın və ərzaq məhsullarının qiymət artımına səbəb olur".
