Martın 17-də keçirilən ümumi (9 illik) orta təhsil səviyyəsi üzrə buraxılış imtahanında istifadə edilən test tapşırıqlarının doğru cavab etalonları açıqlanıb.
Dövlət İmtahan Mərkəzindən APA-ya verilən xəbərə görə, 2024-cü il martın 17-də keçirilən ümumi (9 illik) orta təhsil səviyyəsi üzrə buraxılış imtahanında istifadə edilmiş qapalı və kodlaşdırma tələb edən açıq tipli test tapşırıqlarının doğru cavab etalonları ilə buradan tanış olmaq mümkündür.
Qeyd edək ki, hazırda imtahan materiallarının emalı aparılır. Yazılı cavab verilməsi tələb olunan açıq tipli tapşırıqların yoxlanılması uzun müddət tələb etdiyindən buraxılış imtahanının nəticələrinin yaxın 4 həftə ərzində elan olunması nəzərdə tutulur.
Sual yaranır ki, bu il keçirilən buraxılış imtahanlarında sual formaları necə tərtib olunub və balların qalxma ehtimalı var?
Sosial Tədqiqatlar Mərkəzinin əməkdaşı, elm və təhsil məsələləri üzrə tədqiqatçı Elmin Nuri “Sherg.az”a söyləyib ki, ümumi olaraq 150 minə yaxın şagird buraxılış imtahanlarında iştirak edib:
"Sosial şəbəkələrdə cəmiyyət tərəfindən belə bir fikir formalaşdı ki, ötən ildən fərqli olaraq bu il suallar asan tərtib olunub. Təbii ki, bunun əksini iddia edənlər də var. Fikrimcə, bu deyilənlərin heç biri həqiqəti əks etdirmir. Belə ki, Dövlət İmtahan Mərkəzinin idarə heyyətinin sədri Məleykə Abbaszadə qeyd etdi ki, ötən illə müqayisədə bu il açıq, stiuasiya tipli sualların cavabları daha dolğun və effektiv olub. Uzun illər qapalı suallardan istifadə olunub və cəmiyyət olaraq buna öyrəşmişdik. Sonradan yaradılan yeni imtahan modeli şagirdlərə çox çətinliklər yaratdı. İmtahanda düşən açıq sualların çoxu boş qaldı. Artıq bu tip suallara alışdığımıza görə, bizə elə gəlir ki, suallar daha asan salınıb. Buraxılış imtahanlarında cavabların gec çıxmasının səbəbi isə açıq suallara cavab verənlərin sayının çoxalmasıdır. Burada yoxlamalar kompüterlər deyil, insanlar tərəfindən həyata keçirilir. Böyük ehtimal növbəti il də söyləyəcəklər ki, əvvəlki illərdən fərqli olaraq indi suallar daha asan düşüb. Balların qalxması isə nisbidir. Yəni, bu ayrılan plan yerləri və ixtisas seçimində iştirak edən abituriyentlərin sayına bağlıdır. Say nisbəti bəlli olmasa, hansısa ixtisasın keçid balının qalxıb-enməsi haqda fikir bildirə bilmərik. Təəssüflənirəm ki, özünə ekspert deyənlər, təhsildən anlayışı olmayanlar "tutdu qatıq, tutmadı ayran" prinsipi ilə hərəkət edənlər deyirlər ki, ballar qalxacaq. Maraqlıdır, nəyə dair belə qərara gəliblər? Axı, bunun mexanizmi mövcuddur. Bəzi detallar bilinmədən heç DİM fikir bildirə bilməz".
