Eçmiədzin kilsəsi II Qareginin övladının olub-olmaması ilə bağlı məsələyə açıq mövqe sərgiləməyib.
Bu barədə Ermənistan Baş naziri Aparatı rəhbərinin müavini Taron Çaxoyan açıqlama verib. Onun sözlərinə görə, kilsə bu iddianı nə təsdiqləyib, nə də inkar edib.
"Kilsə bildirir ki, bu kimi məsələlər yalnız kilsə qaydaları çərçivəsində həll olunur. Başqa sözlə desək, onlar belə məsələlərə müdaxilə edilməsini istəmirlər və qərarı özləri verəcəklərini deyirlər. Amma görünən odur ki, kilsənin bu sahədə konkret nizamı belə yoxdur – bir tərəfdən Tanrıya yalandan and içilir, digər tərəfdən isə həmin şəxs katolikos olaraq qalır", – Çaxoyan vurğulayıb.
Qeyd edək ki, Ermənistanın baş naziri Nikol Paşinyan bir gün öncə sosial şəbəkədə paylaşdığı fikirlərdə bildirmişdi: əgər II Qaregin subaylıq andını pozubsa və onun övladı varsa, bu halda o, bütün ermənilərin katolikosu kimi fəaliyyət göstərə bilməz.
Paşinyanın bu çıxışından sonra II Qaregin Eçmiədzin kilsəsində keçirilən yepiskoplar toplantısına dəvət olunub. Lakin nə kilsə, nə də katolikos Paşinyanın açıqlamasına konkret cavab verib.
Politoloq Natiq Miri Sherg.az-a bildirib ki, kilsə hər zaman Ermənistanda həm dövlətin, həm cəmiyyətin, həm də hakimiyyətin üzərində dominant mövqeyə sahib olub:
"Kilsənin təsiri sadəcə Ermənistanda deyil, ölkənin sərhədlərini aşmış vəziyyətdədir. Xaricdəki erməni diasporunun dövlətə yardımı, ianələrin yığılması siyasi-geosiyasi anlamda Ermənistana dəstək prosesində də kilsə ciddi şəkildə iştirak edir. Bu gün kilsə Nikol Paşinyanın baş nazirliyini qəbullana bilmir. Çünki o, kilsənin dövlət üzərində dominantlığını heç cür həzm etmir. Həmçinin Ermənistan Baş naziri başa düşür ki, ona qarşı son etiraz prosesində keşiş Baqratın başçılıq etməsi dolayısı ilə kilsənin siyasi hakimiyyəti ələ almasına xidmət göstərirdi. Lakin bu etiraz dalğası cəmiyyətdə çox dəstək almadığı və kütləviləşmədiyi üçün hakimiyyəti devirmək mümkün olmadı. Buna görə də Paşinyan 2026-cı il parlament seçkiləri öncəsi kilsə ilə hesabı çürütmək istəyir. Eyni zamanda bütün xristian dünyasında din dövlətdən ayrıdır. Lakin Ermənistanda bir növ Vatikanda olan sistemi təkrarlamağa çalışırlar".
Politoloqun fikrincə, Paşinyan yeni konstitusiya ilə dinin dövlətə və siyasətə qarışmamasını qanunla tənzimləmək niyyətindədir:
"Bu təqdirdə kilsənin hakimiyyət üzərindəki əl-qolu bağlanacaq. Həmçinin müxtəlif səviyyələrdə arxiyepiskopların əxlaqsız hərəkətləri ilə bağlı ard-arda ifşalar ortaya qoyulacaq. Nəticə etibarilə kilsə xalqın gözündən salınacaq".
