ABŞ Prezidenti Donald Tramp Rusiya aviabazalarına hücumlar barədə əvvəlcədən məlumatlandırılmayıb.
Teleqraf “Fox News”a istinadən xəbər verir ki, bunu Ağ Evin mətbuat katibi Karolin Levit brifinqdə bildirib.
"Yaxşı olardı ki, prezident özü bu barədə danışsın. Mən buna yalnız onu əlavə edə bilərəm ki, prezident bu münaqişənin davam etməsini istəmir. O, döyüşlərin dayandırılmasını və bu münaqişənin danışıqlar masasında həll olunmasını istəyir", - Ağ Evin sözçüsü deyib.
Xatırladaq ki, daha əvvəl ABŞ-nin “Axios” nəşri adı açıqlanmayan Ukrayna rəsmisinə istinadən məlumat yayaraq, Rusiya aviabazalarına PUA-larla hücumlar barədə Donald Tramp administrasiyasının əvvəlcədən məlumatlandırdığını açıqlamışdı. Əməliyyatın Ukrayna təhlükəsizlik xidməti tərəfindən həyata keçirildiyi və bir ildən çoxdur planlaşdırıldığı bildirilirdi. Lakin sonradan nəşr məqaləyə düzəliş edərək Ukraynanın ABŞ liderini gözlənilən hücum barədə xəbərdar etmədiyini məlumat vermişdi.
