Bu kimi hallarda parkın idarə edilməsi rəhbərliyin öhdəliyindədir və nəzarət mexanizmi onların məsuliyyətinə daxildir
Paytaxtda azyaşlının həyatı təhlükəyə düşüb.
Baku.ws xəbər verir ki, hadisə dünən Mərkəzi parkda baş verib.
Ailə üzvlərinin dediyinə əsasən, ikiyaşlı uşaq parkda açıq qalan kanalizasiya quyusuna düşüb. Quyunun dərinliyinin 1.5-2 metr olduğu bildirilir.
Valideynlərin və ətrafdakı insanların operativ müdaxiləsi nəticəsində uşaq quyudan çıxarılıb. Hadisə nəticəsində xəsarət alan körpə dərhal xəstəxanaya aparılıb və ona tibbi yardım edilib.
İddiaya görə, kanalizasiya quyusunun lükü tam örtülməyib və qapağın möhkəm bağlanması üçün xüsusi yerlər olsa da, onlardan istifadə edilməyib. Bu isə ciddi təhlükə yaradıb.
Təhlükəsizlik üzrə ekspert Samir Nəbiyev “Sherg.az”a bildirdi ki, park ərazisində hovuz, kanalizasiya və digər oxşar obyektlər mövcud ola bilər:
“Bu kimi hallarda parkın idarə edilməsi rəhbərliyin öhdəliyindədir və nəzarət mexanizmi onların məsuliyyətinə daxildir. Bununla yanaşı, əgər söhbət azyaşlı uşaqlardan gedirsə, onların əsasən valideyn nəzarəti altında olmaları tələb olunur. Doğrudur, bu, kanalizasiya lyukunun açıq qalmasına haqq qazandırmır. Lakin azyaşlı uşaqlar istənilən an maşın yoluna çıxa, hər hansı bir yerdən yıxıla, eləcə də kanalizasiya lyukuna, su hovuzuna və ya su quyusuna düşə bilərlər. Bu kimi amillərin qarşısının alınması birinci növbədə valideynlərin məsuliyyəti hesab olunur. Eyni zamanda, əgər açıq sahələr mövcuddursa, məsələn, yolun təmiri ilə bağlı işlər, qaz, su və ya kanalizasiya xətlərinin çəkilişi və bərpa işləri aparılırsa, həmin ərazilər mütləq şəkildə məhəccərlənməli və bağlanmalıdır. Digər tərəfdən, dəmir yığımı ilə məşğul olan şəxslər səbəbindən də problemlər yarana bilər. Adətən kanalizasiya lyukları petlə ilə bərkidilir, lakin köhnə lyuklarda petlənin olmaması onların oğurlanması ehtimalını artırır. Bu baxımdan hər hansı qurumu mütləq təqsirkar kimi göstərmək doğru deyil. Məsələn, yaxın keçmişdə Ziya Bünyadov prospektində avtomobil lyukun üzərindən keçərək qapağı qoparmış və zədələmişdi. Belə hallarda qapağın yenidən yerləşdirilməsi müəyyən vaxt tələb edə bilər. Bu müddət ərzində ora həm insanlar, həm də avtomobillər üçün təhlükə yarana bilər.
Bununla belə, böyüklər öz təhlükəsizliklərini müəyyən dərəcədə təmin edə bilirlər. Lakin azyaşlılar həddi-büluğa çatmamış hesab olunduqlarından onların təhlükəsizliyinə görə əsas məsuliyyət valideynlərin üzərinə düşür”.
