Alimlər Ayda on minlərlə kraterin içində platina qrupuna aid metalların və su izlərinin ola biləcəyini açıqlayıblar.
Sherg.az xəbər verir ki, müstəqil astrofizik Cayanth Chennamangalamın rəhbərliyi ilə yeni araşdırma aparılıb.
Tədqiqatda təxminən 6 min 500 kraterin platina, palladium və rodium kimi qiymətli metallar saxlaya biləcəyi irəli sürülüb. Bu metallar sənaye və tibbdə kritik əhəmiyyətə malik olsa da, Yer üzündə olduqca nadir tapılır.
Araşdırmaya görə, təxminən 3 min 400 kraterdə isə suyun hidratlı minerallar şəklində mövcud olması mümkündür.
Mütəxəssislər bildiriblər ki, bu resurslar gələcəkdə Ayda qurulacaq bazalarda insanlı missiyalar üçün böyük önəm daşıya bilər. Açıqlamada xüsusilə 19 kilometrdən böyük və mərkəzində təpə quruluşu olan kraterlərin metal zənginliyi baxımından ən güclü namizədlər olduğu qeyd olunub.
Alimlər vurğulayıblar ki, kosmik mədənçilik Yer kürəsinin məhdud ehtiyatlarına alternativ kimi görülür. Bundan başqa, Ayda suyun aşkar edilməsi halında bu resursun astronavtların ehtiyaclarını ödəmək üçün istifadə oluna biləcəyi, bununla da Yerdən su daşımaq məcburiyyətini azaldacağı qeyd olunub.
Araşdırma çərçivəsində Ay səthinə göndəriləcək bahalı eniş aparatları əvəzinə, orbitdən həyata keçiriləcək uzaqdan zondlama üsulları ilə hədəf kraterlərin müəyyənləşdirilməsi tövsiyə edilib.
