Rusiya və ABŞ uduzan tərəf olmamaq üçün birgə səy göstərirlər
Rusiya və ABŞ BMT Təhlükəsizlik Şurasına Suriyadakı vəziyyətlə bağlı qapalı məsləhətləşmələrin keçirilməsi üçün sorğu göndərib.
Bunu Rusiyanın BMT-dəki daimi nümayəndəsinin birinci müavini Dmitri Polyanski deyib.
Qapalı məsləhətləşmənin bu gün mətbuata qapalı olaraq keçiriləcəyi və münaqişənin dayandırılması üçün həll yollarının müzakirə ediləcəyi gözlənilir.
Qeyd edək ki, Suriyada təhlükəsizlik qüvvələri ilə devrilmiş prezident Bəşər Əsədə tərəfdarları arasında martın 6-dan bəri davam edən qarşıdurmalarda 745 mülki şəxsin və 125 təhlükəsizlik qüvvəsi üzvünün həlak olduğu, 148 Əsəd tərəfdarının da zərərsizləşdirildiyi bildirilir.
Hərbi-siyasi ekspert Həşim Səhrablı “Sherg.az”a deyib ki, Birləşmiş Millətlər Təşkilatının beş daimi üzvündən ikisi olan Amerika və Rusiyanın sorğusu müzakirəyə şübhəsiz çıxarılacaq:
“Lakin müzakirənin necə nəticələnəcəyini öncədən söyləmək çətindir. Çünki BMT-nin Təhlükəsizlik Şurasında daimi olmayan digər üzvlərdə var ki, onların dünya siyasətinə yanaşması bəzən eynilik, bəzən isə ziddiyət təşkil edə bilir. Burada diqqət çəkən məqam Rusiya və Amerika kimi bütün məsələlərdə əks qütbdə olan ölkələrin hazırda Suriya məsələsi üçün ortaq sorğu göndərməsidir. Əslində bu məsələ müəyyən qədər anlaşılandır. Çünki Suriyada iqtidara gələn rejimin Rusiya və Donald Tramp ilə əlaqələri o qədər də yaxşı deyil. Həmin iqtidarın maraqları daha çox Qərb dövlətləri, Türkiyə və Ərəb ölkələriylə kəsişir. Ona görə də Amerika və Rusiya Suriyada yaşanan hadisələrdən narahatlıq duyurlar. Heç bir ölkə Suriyada mövqeylərini itirmək və maraqlarının təhlükə altında qalmasını istəmədiyinə görə nəticənin necə olmasından asılı olmayaraq özlərinə uyğun vəziyyət formalaşdırmağa çalışırlar. Rusiya və Amerika Suriya məsələsində uduzan tərəf olmamaq üçün birgə səy göstərirlər. Birləşmiş Millətlər Təşkilatında Suriya məsələsinin qabardılması isə təsadüfi deyil. Onlar dünya ictimaiyyətini yeni iqtidar üzərində təsir mexanizmi kimi formalaşdırmaq istəyirlər. Beləliklə yeni iqtidar bir növ çətin vəziyyətə düşəcək və Amerika, Rusiya kimi böyük dövlətlərin dəstəyinə ehtiyac duyacaqlar. Belə olan halda Amerika və Suriya Suriyada yeni rejimə istədikləri şərtləri diqtə etdirə biləcəklər. BMT və digər beynəlxalq təşkilatların qanun çıxarmaq, veto qoymaq kimi səlahiyyətləri olsa da, nəticə etibarilə onların verdiyi qərarlar kağız üzərində qalır və de-fakto hadisələrini yönünü dəyişə bilmir. Yəni BMT Təhlükəsizlik Şurasının Rusiya və Amerikanın təzyiqi ilə Suriyadakı vəziyyətə uyğun qərar verməsindən asılı olmayaraq bölgədəki status-kvo onların qərarı ilə dəyişməyəcək”.
