Türkiyə-İsrail arasındakı mübarizə hökumətlər arasındadır
Yaxın Şərqdəki proseslər, xüsusilə Fələstin-İsrail münaqişəsi fonunda, Türkiyə ilə İsrail arasındakı münasibətləri gərginləşdirib. Hazırkı Türkiyə rəhbərliyi Baş nazir Binyamin Netanyahunun kabineti ilə əlaqə qurmaq niyyətində deyil. “Hürriyet” qəzetinin məlumatına görə, Ankara üçün əsas meyar İsraildə formalaşacaq hökumətin ideoloji yönümü və siyasəti olacaq. ABŞ-nin Ankaradakı səfiri Tomas Barak isə iki ölkə arasında əməkdaşlığın mümkün olduğunu bildirib. Lakin gələcəkdə vaxtlarda İsrail-Türkiyə münasibətlərinin taleyinin necə olacağı yenə də sual altındadır.
Politoloq Zeynal Əmrəliyev Sherg.az-a açıqlamasında Türkiyə-İsrail arasındakı mübarizənin hökumətlər arasında olduğunu söyləyib:
"Açıqlamalardan da görünür ki, əsas gərginlik məhz iki hökumət arasında yaşanır. Burada ideoloji baxımdan ciddi fərqlilik mövcuddur. Hazırkı AK Partiya hökuməti bölgədəki müsəlman ölkələrinin maraqlarını müdafiə edən, İslam dünyasında lider mövqeyini hədəfləyən siyasət yürüdür. Türkiyə Prezidenti Rəcəb Tayyib Ərdoğanın İslam dünyasında nüfuzu kifayət qədər güclüdür. Bu düzgün mövqedir. Türkiyə uzun illərdir bu regionda xüsusilə də Yaxın Şərqdə aktiv rol oynayır. Bu bölgələrin “qızıl dövrü” Osmanlı imperiyası dövrünə təsadüf edir. İndi isə əgər İsrail və ya başqa bir dövlət bu regionda Türkiyənin mövqeyinə qarşı siyasət yürüdərsə, AK Partiya hökuməti bu siyasətə qarşı öz mövqeyini ifadə etməyə qadirdir. Bu, təkcə sözlə deyil, konkret addımlarla da dəfələrlə sübut olunub:
Ekspert Fələstin məsələsinin ədalətli şəkildə həll olunmadığı, xüsusən də İsrailin “iki dövlətli həll” prinsipini qəbul etmədiyi təqdirdə Təl-Əviv və Ankara arasında hansısa ciddi uzlaşmadan danışmağın çətin olduğunu söyləyib:
"Əgər gələcəkdə İsraildə hakimiyyətə gələn yeni hökumət də eyni siyasəti davam etdirərsə, münasibətlər gərgin olaraq qalacaq. Bu isə əslində İsrailin öz maraqlarına da ziddir.
Unutmayaq ki, Türkiyə NATO-nun ikinci ən böyük hərbi gücüdür və həm Ərəb dünyasında, həm də ümumilikdə Yaxın Şərqdə mühüm təsir gücünə malikdir. Prezident Ərdoğanı bu bölgədə bir çoxları lider kimi qəbul edir. Bu baxımdan, İsrail hökuməti Türkiyə ilə dil tapmağa çalışmalıdır. Əks halda, münasibətlərdə gərginliyin qalması qaçılmazdır".
Banuçiçək Kalbalıyeva
