Buna görə də Kiyev, hətta Vaşinqtonun məsələyə fərqli baxışı olsa belə, Odessanın itirilməsinə razı olmayacaq
Kiyev ABŞ Prezidenti Donald Trampın Odessa limanının Rusiyanın nəzarətinə keçməsinə razılıq verə biləcəyindən ehtiyat edir.
Bu barədə “Nyu York Tayms” Ukrayna Prezidenti Vladimir Zelenskinin köməkçilərindən birinə istinadla məlumat yayıb.
“Onlar narahatdırlar ki, Tramp Rusiyanın Ukraynanın digər hissələrinə, o cümlədən Odessa limanına nəzarəti ələ keçirməsinə razılıq verə bilər”, - məlumatda qeyd olunub.
Politoloq Elxan Şahinoğlu "Sherg.az"a deyib ki, Kiyev heç vaxt Odessanın Rusiyanın nəzarətinə keçməsi ilə razılaşmaz, çünki bu, şəhərin işğalı demək olardı:
"Odessa təkcə strateji yox, həm də iqtisadi baxımdan Ukrayna üçün həyati əhəmiyyət daşıyan bir limandır. ABŞ və ya digər Qərb ölkələrinin bu məsələyə yanaşması fərqli ola bilər, lakin Ukrayna üçün burada əsas məqam milli təhlükəsizlik və suverenlik məsələsidir. Onsuz da Ukrayna müharibə nəticəsində əsas liman şəhərlərindən biri olan Mariupolu itirib. Bununla da ölkənin Azov dənizinə çıxışı demək olar ki, tamamilə məhdudlaşıb. Çünki həmin ərazi hazırda Rusiyanın nəzarətindədir. Odessanın əldən verilməsi, Ukraynanın Qara dənizdəki mövqeyinə ciddi zərbə vuracaq və dəniz ticarətini tamamilə iflic edəcək. Buna görə də Kiyev, hətta Vaşinqtonun məsələyə fərqli baxışı olsa belə, Odessanın itirilməsinə razı olmayacaq. Çünki bu, Ukraynanın geosiyasi və iqtisadi maraqlarına düz gəlmir və ölkənin dəniz yolu ilə xarici dünyaya çıxışını mümkünsüz hala sala bilər. Belə bir ssenari isə Ukrayna üçün təkcə hərbi yox, həm də iqtisadi və diplomatik baxımdan ağır nəticələr doğurar".
