Ortada faktiki olaraq hansısa sənədin olacağını görməyəcəyik
ABŞ Prezidenti Donald Tramp çərşənbə axşamı rusiyalı həmkarı Vladimir Putinlə danışmağı planlaşdırdığını bildirib. O, bu barədə jurnalistlərə açıqlamasında deyib.
O bildirib ki, bizimlə Rusiya arasında hər şey yaxşı gedir. Baxaq, bəlkə çərşənbə axşamına qədər nəsə elan edəcəyik. Çərşənbə axşamı Prezident Putinlə danışacağam.
Tramp qeyd edib ki, Putinlə söhbəti zamanı ərazilər məsələsini müzakirə etmək niyyətindədir. Torpaqdan danışacağıq. Elektrik stansiyalarından danışacağıq, çünki bu, böyük məsələdir.
Hərbi-siyasi ekspert Həşim Səhrablı “Sherg.az”a bildirib ki, danışıqlardan sonra Putin və Tramp arasında təmas baş tutsa belə, ciddi razılaşmanın olacağını düşünmür:
“Rusiya, Ukrayna və Amerika bəyanatlarda sülhə meyilli olduqlarını bildirsələr də, mahiyyət etibarilə bütün tərəflərin gətirdiyi arqumentlər arasında dərin uçurumlar mövcuddur. Ona görə də konkret nəticəyə gəlmək mümkün deyil. Məsələn, Ukrayna tərəfi ərazilərindən əl çəkməyəcəyini, Rusiya isə işğal etdiyi torpaqları geri qaytarmayacağını söyləyir. Tramp və Putin arasındakı danışıqlar da ümumi yanaşmalardan ibarət olacaq. Yəni hər iki tərəf sülhün əldə edilməsinin vacibliyini təstiqləyəcəklər. Lakin ortada faktiki olaraq hansısa sənədin olacağını görməyəcəyik. Çünki Rusiya tərəfi birmənalı olaraq güzəştə getməyəcəklərini söyləyiblər. Ukrayna tərəfinin də güzəştə gedəcəyi qeyri-mümkündür. Ancaq Tramp və Putin arasında birbaşa təmasların olması liderlər səviyyəsində informasiya kanallarının açılması deməkdir. Beləliklə hər iki tərəf bundan sonra mövcud məsələlər ətrafında daha ətraflı danışacaqlar”.
