“Baş nazir anlayır ki, rus hərbi bazası, rus biznesi, rus sərhədçiləri və digər ağır problemi Azərbaycan və Türkiyə ilə münasibətləri düzəltmədən həll edə bilməz”
Gürcüstanın sabiq prezidenti Mixail Saakaşvili öz feysbuk səhifəsində Ermənistanın Baş naziri Nikol Paşinyana Rusiya ilə bütün əlaqələri tezliklə kəsməyi tövsiyə edib. O, Paşinyana qaçmağı məsləhət görüb: “Rusiya demək olar ki, bütün Ermənistan kənd təsərrüfatı məhsullarının və erməni konyakının idxalına qadağa qoyub. Amma bu qadağa Paşinyan üçün qırmızı işığı yandırmalıdır. Putin erməni konyakını yox, Paşinyanın özünü bəyənmədi və embarqo onu hakimiyyətdən sıxışdırmaq üçün növbəti addımdır.
Mən bunu Ermənistanın baş naziri üçün bir daha təkrar etmək istəyirəm. Hörmətli Nikol - qaç, daha sürətli qaç, KTMT-dən, Avrasiya İttifaqından arxaya baxmadan qaç, Avropa Birliyinə, NATO-ya, yeni regional birliklərə qaç! Amma ən əsası ayağınızı Rusiyadan uzaqlaşdırın, özünüzü və erməni dövlətçiliyini xilas edin! Putin buldoq kimidir. Dişlərini keçirdir və buraxmır. Sağ qalmaq üçün bu dişləmədən uzaqlaşın! Əminəm ki, hələ də gec deyil. Tərəddüd etməyi dayandırın. Gecikmək ölüm kimidir!” .
Siyasi şərhçi Azər Rəşidoğlu isə “Sherg.az”a açıqlamasında deyib ki, Ermənistan Rusiyadan asılı vəziyyətdədir. Ordu, iqtisadiyyat tam Kremlin nəzarətindədir:
“Bu baxımdan, İrəvanın Rusiyanın orbitindən çıxması inandırıcı deyil. Ermənistanın indiki vəziyyətdə KTMT-dən çıxması da real görünmür. Hazırda Ermənistanın, sadəcə, Rusiya və İranla sərhədlərinin açıq olduğunu nəzərə almaq lazımdır. Yəni İrəvan hakimiyyətinin Azərbaycan, Türkiyə və Gürcüstanla münasibətlərini tam düzəltmədən, sərhədlər açılmadan KTMT-dən çıxmaq kimi bir qərar verəcəyini düşünmürəm”.
A.Rəşidoğlunun fikrincə, Ermənistan hakimiyyəti məğlub olduqları İkinci Qarabağ müharibəsində Rusiyadan kifayət qədər dəstək almadığını iddia edir. Nikol Paşinyan iqtidarı da bu səbəbdən anti-Rusiya addımları atır:
“Amma nəzərə almaq lazımdır ki, Ukrayna müharibəsinə görə küncə sıxışan Rusiyaya qarşı bu addımları atmaq artıq hər zaman olduğundan daha çox mümkündür. Paşinyanın Rusiyaya qarşı atdığı addımlarına xalq da dəstək verir. Düşünürəm ki, Rusiyanın mövcud vəziyyəti və xalqın Paşinyana dəstəyi nəzərə alınarsa, onun anti-Rusiya siyasəti səhv sayılmaya bilər. Hələlik Nikolu devirmək üçün Rusiyanın əlinə fürsət düşməyib. Real olaraq Paşinyanı devirmək üçün şansa malik deyillər. Daha doğrusu, Paşinyan ruslara bu imkanı vermir. Elan edir ki, Ermənistan Kollektiv Müqaviləsi Təşkilatının üzvlüyünə sadiqdir, Ermənistanda Rusiya hərbi bazasının qalmasını istəyir və s. Paşinyan Saakaşvilinin səhvlərini təkrarlamır. Amma o, anlayır ki, rus hərbi bazası, rus biznesi, rus sərhədçiləri və digər ağır problemi Azərbaycan və Türkiyə ilə münasibətləri düzəltmədən həll edə bilməz. Paşinyan Kremlə bəhanə vermir. Odur ki, Saakaşvilinin bəyanatına onun ciddi yanaşacağını düşünmürəm".
