Hindistanın vitse-prezidenti Canqdip Dhankhar istefa verib.
Oxu.Az xəbər verir ki, o, mətbuat xidməti vasitəsilə müvafiq açıqlama yayıb.
"Sağlamlığıma daha çox diqqət yetirmək və həkimlərin tövsiyələrinə əməl etmək məqsədilə Hindistanın vitse-prezidenti vəzifəsindən istefa verirəm", - deyən siyasətçi prezidentə, baş nazirə, parlamentə və Nazirlər Kabinetinə birgə fəaliyyətlərinə görə təşəkkürünü bildirib.
Qeyd edək ki, Dhankhar avqustda 74 yaşını qeyd edəcək. O, 2022-ci ilin avqustundan vitse-prezident vəzifəsini icra edib. Siyasətçi yaxınlarda angioplastika əməliyyatı keçirib.
Vitse-prezident vəzifəsi Hindistan prezidentindən sonra ən yüksək konstitusiya vəzifəsidir. Vitse-prezident həmçinin ölkə parlamentinin yuxarı palatasının sədri vəzifəsini də yerinə yetirir.
Hindistanın vitse-prezidenti parlamentin hər iki palatasının nümayəndələrindən ibarət seçki kollegiyasının üzvləri tərəfindən dolayı gizli səsvermə yolu ilə seçilir. Səlahiyyət müddəti beş ildir.
