Livan İranın siyasi dəstəyi ilə aprelin 12-dən başlayaraq İsraili raket atəşinə tutur. Bununla bərabər İran-İsrail münaqişəsi son dərəcə kəskinləşir. Bəs bu qarşıdurmada tərəflərin məqsədləri nələrdir? Bu hadisələr İran-İsrail müharibəsinin ayaq səsləridirmi? Azərbaycanın bu hadisələrə münasibət necə olacaq?
Siyasi və Hüquqi Araşdırmalar Mərkəzinin (SHAM) sədri Xəyal Bəşirov "Sherg.az"a bildirib ki, İsrail-İran münasibətilərinin kəskinləşməsi birinci dəfə baş vermir:
"İran 1979-cu ildəki İslam inqilabından bəri İsrail və onun Qərbdəki müttəfiqləri ilə qarşıdurma içərisindədir. Bu qarşıdurmalar zaman-zaman alovlanıb və silahlı münaqişə həddinə çatsa da, İran İsrail və onun Qərbdəki müttəfiqləri ilə birbaşa yox Suriya, Həmas, Livan və Husilər vasitəsilə mübarizə aparır. Rusiya və onun müttəfiqləri burada İranı və Həması dəstəkləməklə beynəlxalq ictimaiyyətin diqqətini Ukraynadan Yaxın Şərqə yönləndirmək istəyir. Qərb isə bu səbəbdən İsrail-İran münaqişəsinin alovlanmasını istəmir. İsrail-Həmas müharibəsinə gəldikdə isə İsrail burada hərbi üstünlüyə malik olsa da, istəyinə tam nail ola bilməyib. Hətta Qəzzadakı hadisələr İsrailin dünyadakı nüfuzuna zərbə vurub. Düşünürəm ki, hazırkı mərhələdə İran öz istəyinə müəyyən qədər nail olub və İsrail ilə birbaşa müharibəyə girmək niyyətində deyil. Azərbaycanın buradakı mövqeyinə gəldikdə isə rəsmi Bakı bir tərəfdən İsrail ilə yaxın münasibətlərə malik olsa da, digər tərəfdən İran ilə əlaqələri normallaşdırır. Azərbaycan daim müharibəyə qarşı olub və sülhün tərəfdarıdır. Düşünürəm ki, Azərbaycanın bundan sonra da münasibəti belə davam edəcək".
Yusif Məmmədxanlı
