Ermənistanın keçmiş müdafiə naziri Arşak Karapetyan “Ümumerməni Cəbhəsi” adlı yeni partiya yaradıb. “Ümumerməni Cəbhəsi” adlı yeni partiya yaradıb. Ötən gün keçirilən qurultayda o, bu siyasi təşkilatın sədri seçilib. Karapetyan bildirib ki, hazırkı hökumət ölkəni idarə etmək iqtidarında deyil. Partiya sədri baş nazir Nikol Paşinyanı istefaya çağırıb: “Biz daha güclü Ermənistan yaradacağıq. Bütün dəyişikliklərə partiyamız yox, xalq qərar verəcək”, o deyib. Qeyd edək ki, bu vaxtadək sözü gedən təşkilat hərəkat kimi fəaliyyət göstərib. Əksər ekspertlər bu partiyanın, daha doğrusu general Karapetyanın birbaşa Rusiyaya, Kremlə bağlı olduğunu deyirlər. Partiyanın yaradılmasının da Moskvanın planı olması qeyd olunur və iddia edilir ki, Kreml Paşinyanı bu yolla devirməyi planlaşdırır.
AĞ Partiya sədrinin müavini Əhəd Məmmədli isə "Sherg.az"a açıqlamasında vurğulayıb ki, o, Arşak Karapetyanın Ermənistanda kifayət qədəri güclü sosial bazaya, dəstəyə malik olduğunu düşünmür.
Siyasi şərhçi qeyd edib ki, A.Karapetyan arxasında Rusiya olsa belə Ermənistanın indiki baş naziri Nikol Paşinyanı devirmək iqtidarında deyil:
"Rusiya Koçaryanın, Sarkisyanın, Sarukyanın da arxasında dayanmışdı. Hansısa nəticə əldə olundumu? Müəyyən təşəbbüslərin nəticələri göz qabağındadır. Ermənistanda Karapetyanın nüfuzu Koçaryandan, yaxud Sarukyandan çox deyil. Düzdür, vəziyyət dəyişə, hətta Paşinyan da devrilə bilər. Demirik ki, Paşinyan əbədi qalacaq. Getdikcə Ermənistan daxilində Paşinyanın səs faizi aşağı düşməkdədir. Hətta bəzi sorğularda baş nazirin reytinqinin 17 faizə düşdüyü iddia olunur. Amma növbəti seçkilərdə Paşinyanın toparlanıb rəqibləri üzərində qələbə qazanma ehtimalı yüksək olaraq qalır. Çünki Paşinyanın reytinqi düşüb, amma rəqiblərinin nüfuzu yüksəlməyib axı".
Ekspert vurğulayıb ki, Paşinyanın qarşısına qoyulacaq alternativ, populyar lider ortada yoxdur:
"Koçaryana, Sarkisyana, Sarukyana inanmayan xalq Karapetyana da inanmayacaq. O baxımdan hazırda Paşinyanın devrilməsi real görünmür. Həm də Paşinyanı ruspərəst siyasətçinin əvəzləyəcəyi qarantiyası da yoxdur. Ola bilər, Paşinyanı başqa qərbyönlü siyasətçi əvəzləsin. Paşinyanın siyasi taleyi həm də Azərbaycanla bağlı atacağı addımlardan asılıdır".
