Vladimir Putin Alyaskada keçirilməsi planlaşdırılan görüşü Ukrayna müharibəsini öz şərtləri ilə bitirmək və Qərb təhlükəsizlik alyansında parçalanma yaratmaq imkanı kimi görür.
Teleqraf xəbər verir ki, bu “The New York Times” (NYT) məlumat yayıb.
Nəşr yazır ki, iyulun sonunda Donald Trampın mövqeyi Putinə qarşı sərtləşməyə başlayıb. O, aylarla nəticəsiz qalan danışıqlardan sonra ultimatumlar irəli sürüb və hətta Ukrayna prezidenti Volodimir Zelenski ilə münasibətlərini yumşaldıb. Tramp Rusiyadan neft alan ölkələrə qarşı yüksək tariflər tətbiq etməklə hədələyib.
Kreml isə taktikasını dəyişib. Son görüşdə Putin, Trampın xüsusi nümayəndəsi Stiv Uitkoffa, Rusiya ilə “ərazi mübadiləsi” barədə danışaraq, kompromisə hazır olduğunu bildirib. Ekspertlərin fikrincə, Putin Trampın anlayacağı “daşınmaz əmlak dili”ndə danışaraq onunla Zelenskisiz birbaşa görüş imkanı əldə edib.
Lakin analitiklər Rusiyanın təkcə ərazi sövdələşməsi ilə kifayətlənəcəyinə inanmır. Putin Ukraynanın NATO-ya qoşulmaması, ərazisində Qərb qoşunlarının yerləşməməsi və hərbi potensialının məhdudlaşdırılması kimi şərtlər irəli sürür.
Putinin Alyaskada Trampla görüş üçün üç ssenarisi var:
Trampın Ukraynaya qəbul etdirməyə çalışacağı Rusiya üçün sərfəli saziş;
Zelenskinin imtinası nəticəsində ABŞ-nin Ukraynaya dəstəyini dayandırması;
Mövcud müharibə kursunu daha 12–18 ay davam etdirmək.
Ekspertlər hesab edir ki, Trampın Rusiyanın işğal etdiyi ərazilərin böyük hissəsini tanıması ABŞ və Avropa arasında uzunmüddətli gərginlik yarada bilər.
Almaniyalı analitik Stefan Meystrin sözlərinə görə, Putin üçün əsas məqsəd yalnız müharibəni bitirmək deyil, Rusiyanın strateji mövqeyini dəyişmək və “tarixi mirasını” formalaşdırmaqdır. Onun fikrincə, Zelenskinin sammitdə iştirak etməməsi Ukrayna üçün ciddi təhlükə yarada bilər.
