Aytən Qurbanova: “Kreml müharibənin davamında maraqlıdır”
Türkiyə Prezidenti Rəcəb Tayyib Ərdoğanın iyulun 23-nə planlaşdırılan qrafikində danışıqlar üçün İstanbula gələcək Rusiya və Ukrayna nümayəndə heyətləri ilə görüş nəzərdə tutulmayıb.
Bu barədə Türkiyənin Prezident administrasiyası məlumat yayıb.
Qeyd olunur ki, iyulun 23-də R.T.Ərdoğan Ankarada hakim Ədalət və İnkişaf Partiyası və polis akademiyasının məzunları ilə iki tədbir keçirəcək. Türkiyə liderinin proqramında başqa görüş və ya tədbir yoxdur.
Politoloq Aytən Qurbanova Sherg.az-a bildirib ki, hazırkı mərhələdə Rusiya ilə Ukrayna arasında danışıqların hər hansı formada uğurlu nəticə verməsini gözləmək kifayət qədər sadəlövh yanaşma olardı:
"Çünki verilən bəyanatlar, hərbi cəbhədə əməliyyatların intensivləşməsi və Rusiyanın qeyri-konstruktiv mövqeyini davam etdirməsi göstərir ki, Kreml müharibənin davam etməsində maraqlıdır. Ən azından yayın sonuna qədər hərbi əməliyyatların dayanmayacağı ilə bağlı proqnoz vermək və buna ehtimal etmək mümkündür. Çünki növbəti mərhələdə keçiriləcək görüşlərdə Rusiya daha çox əraziləri nəzəri üstünlük kimi masaya qoyaraq öz şərtlərini diktə etməyə çalışacaq. Belə olan halda, İstanbulda keçirilməsi nəzərdə tutulan görüşlərdən hər hansı bir ciddi nəticənin əldə olunacağını gözləmək real deyil. Əvvəlki İstanbul görüşlərini nəzərə alsaq, növbəti raundda da əsasən humanitar məsələlərlə bağlı müəyyən razılaşmaların əldə olunacağını ehtimal etmək olar. Lakin daha irəli şərtlərlə, xüsusilə atəşkəsin ilkin şərtləri ilə bağlı konstruktiv yanaşmaların ortaya çıxacağını düşünmürəm. Bu kontekstdə, Ukrayna və Rusiya nümayəndələrinin ikitərəfli formatda görüş keçirməsi və müəyyən nəticələrin əldə olunması mümkündür".
Politoloq əlavə edib ki, əsaslı və irimiqyaslı şərtlərlə bağlı istər Türkiyə, istərsə də digər üçüncü və ya dördüncü tərəflərin iştirakı olmadan real nəticələrə nail olunacağı inandırıcı görünmür:
"Elə bu səbəbdən, İstanbulda keçiriləcək görüşdə Türkiyə Prezidenti Rəcəb Tayyib Ərdoğanın hər hansı nümayəndə heyəti ilə rəsmi görüşünün nəzərdə tutulmaması da onu deməyə əsas verir ki, bu görüş əsasən humanitar məsələlərin müzakirəsinə həsr olunacaq".
