Almaniya 2031-ci ilə qədər 18 yaşlı gənclər arasından könüllülərin sayını hər il 40 min nəfərə çatdırmaqla “Avropanın ən güclü ordusu”nu yaratmağa hazırlaşır.
Məlumatı “Financial Times” paylaşıb.
Nəşrin məlumatına görə, Almaniya hökumətinə avqustun sonunda alman ordusunu xeyli gücləndirəcək qanun layihəsi təqdim olunacaq. 2025-ci ildə Almaniya Müdafiə Nazirliyi könüllülər proqramı çərçivəsində 15 min gəncin işə götürülməsini gözləyir. Bu rəqəmin 3-5 min nəfər artırılması təklif edilir.
Könüllülərə vergilərsiz ayda 2 min avro maaş veriləcəyi gözlənilir. Onlar yeni bacarıq və ixtisaslar əldə edə, dil kursları keçə və sürücülük vəsiqəsi almaq üçün subsidiyalar ala biləcəklər.
Türkiyə Müdafiə Sənayesi və xarici siyasət analitiki Suat Delgen Sherg.az-a bildirib ki, Almaniya Avropa İttifaqı (Aİ) daxilində bu günə qədər ən böyük iqtisadi güc olaraq təhlükəsizliyini NATO vasitəsilə, əsasən də ABŞ üzərindən təmin edirdi:
"Lakin Ukrayna böhranından sonra və xüsusilə də ABŞ-da Donald Trampın hakimiyyətə gəlməsi ilə Almaniya anladı ki, təhlükəsizliyini özü təmin etməzsə və kritik silah sistemləri baxımından Amerikaya asılı vəziyyətdə qalarsa, arzuladığı güc mərkəzinə çevrilə bilməyəcək. Buna görə də Almaniya təhlükəsizliyini özü təmin edə bilmək üçün müdafiəsinə sərmayə yatırır. Yəni həm ordusunun sayını artırmağa çalışır, həm də istehsal zəncirlərini yenidən canlandırır. Əslində bu proses, yeni formalaşan dünya nizamında Aİ-nin və onun iqtisadi lokomotivi olan Almaniyanın ABŞ-dan mümkün qədər müstəqil şəkildə təhlükəsizlik sistemini, yəni təhlükəsizlik arxitekturasını qurmağa yönəlmiş ilk mərhələdəki addımları kimi qiymətləndirilə bilər".
