Bir müddət Rusiya-Ukrayna müharibəsi ilə bağlı ziddiyyətli bəyanatları ilə gündəmdə olan ABŞ Prezidenti Donald Tramp kəskin dönüş edib. O, hətta sentyabrda bəyan elədi ki, Ukrayna nəinki Rusiyanı məğlub edə, həm də işğal olunmuş ərazilərin hər qarışını geri qaytara və əvvəlki sərhədlərini bərpa edə bilər.
Teleqraf xəbər verir ki, bu barədə “The Telegraph” məlumat yayıb.
Britaniya nəşri yazıb ki, əgər Rusiya lideri Vladimir Putin hansısa şəkildə Trampın radikal hökmlərindən azad olduğuna inanırdısa, son hadisələr onun üçün şoka çevrilib:
“Oktyabrın 22-də Tramp qəfildən Putinlə zirvə görüşünü ləğv etdi, “Rosneft” və “Lukoyl”u sarsıdan sanksiyalar tətbiq etməklə Rusiyanın neft gəlirlərinin qarşısını almaq üçün addımlar atdı.
Ziqzaqların arasında Trampın Ukrayna siyasəti zəncirvari şəkil almağa başlayıb: Amerika Rusiyanın qalib gəlməsinə imkan verməyəcək, amma Konqres də yeni çoxmilyardlıq yardım paketləri tələb etməyəcək. Tramp gözləyəcək ki, Avropa Ukraynaya dəstək xərclərinin əsas hissəsini öz üzərinə götürsün, hər hansı Amerika silahı hədiyyə olaraq verilməyəcək, amma kommersiya şərtləri ilə Kiyevə satılacaq”.
Nəşrin fikrincə, son sanksiyalar Donald Trampın Rusiyaya sələfi Co Baydendən daha çox iqtisadi təzyiq göstərməyə hazır olduğunu göstərir.
“Tramp başa düşdü ki, Ukraynanın uduzmasına icazə verə bilməz, xüsusən də məsuliyyət onun üzərinə qoyulubsa. Maliyyə boşluqlarını bağlamaq üçün avropalılara maksimum təzyiq göstərmək üçün hər şeyi edir”, - Britaniyanın keçmiş xarici işlər naziri Ceremi Hant deyib.
Mənbə əlavə edib ki, Tramp hər nə qədər ziddiyyətli görünsə də, Ukrayna və ya digər beynəlxalq böhranlardan qaçmayacaq.
