Türkiyədə FETÖ ilə əlaqələrdə şübhəli bilinərək saxlanılan Qırğızıstan vətəndaşı Yermek Sabırjanov vətəninə qayıdıb.
Teleqraf xəbər verir ki, bu barədə məlumatı Qırğızıstanın Ankaradakı səfiri Ruslan Kazakbayev məlumat verib.
O bildirib ki, Sabırjanovla bağlı məsələ ilk gündən Qırğızıstan Prezidenti Sadır Japarovun və Xarici İşlər Nazirliyinin nəzarətində olub.
Qırğızıstan vətəndaşı sentyabrın 9-da İzmirdə birbaşa məhkəmə zalından azad edilib və ona Qırğızıstana qayıtmağa icazə verilib.
34 yaşlı Yermek Sabırjanov mayın 22-də Ankarada saxlanılıb və dindirilib, mayın 23-də isə həbs olunub. Hüquq-mühafizə orqanları onu Esenboğa Beynəlxalq Hava Limanında, həyat yoldaşı və üç uşağı ilə birlikdə Bişkek-Ankara-Şimali Kipr reysi ilə yola düşərkən saxlayıblar. Ailə istirahətə gedirmiş.
Türkiyənin hüquq-mühafizə orqanları onu FETÖ ilə əlaqələrdə ittiham ediblər. Yermek Sabırjanov 2014-cü ildə İzmirdə təhsil alıb.
