Müharibə başlayandan bəri Kiyevin ən ağır atəşə tutulduğu bir vaxtda Donald Trampın müşaviri general Keyt Kelloqun təşəbbüsü ABŞ-ın Ukrayna siyasətində dramatik dönüşün başlanğıcı oldu.
Axar.az xəbər verir ki, bu barədə Britaniyanın “Telegraf” nəşri yazıb.
“İyulun 4-də Kelloqa Polşadan zəng gəlib. Bu, Polşanın xarici işlər naziri Radoslav Sikorski idi. Bu zəngdən sonra general Kelloq Trampı Ukraynaya zenit sursatlarının tədarükünü bərpa etməyə çağırıb. Həmin gecə Rusiya raketləri və pilotsuz təyyarələri Polşanın Kiyevdəki konsulluğuna ziyan vurmuşdu və bu hadisə Ağ Evin Ukraynaya münasibətində dönüş nöqtəsi oldu.
Kelloqla telefon danışığından qısa müddət sonra Tramp şəxsən Pentaqona “Patriot” sistemlərini blokdan çıxarmağı və Ağ Evin icazəsi olmadan belə Ukraynaya hərbi yardımı dayandıran müdafiə naziri Pit Heqsetlə əlaqə saxlamağı əmr etdi”, - məlumatda qeyd olunub.
Nəşr bildirib ki, həmin gün Prezident Vladimir Zelenski ilə söhbətində də Tramp Ukraynaya hava hücumundan müdafiə dəstəyi verəcəyini vəd edib:
“Bu siqnal dönüş nöqtəsi oldu. Vaşinqtonda bu, sülh razılaşmasına nail olmaq üçün münaqişədə ABŞ-ın rolunun gücləndirilməsi zərurətinin etirafı kimi qiymətləndirildi. Doqquz gün ərzində Tramp NATO müttəfiqlərinin dəstəyi ilə 10 milyard dollarlıq yeni yardım paketini açıqladı. Almaniya kansleri Fridrix Merz və NATO Baş katibi Mark Ruttenin köməyi ilə razılaşmaya Ukraynaya yeni “Patriot” sistemlərinin alınması və yerləşdirilməsi daxil edilib ki, bu sistemlərin bir hissəsinin pulu Almaniya və Norveç tərəfindən ödənilib”.
