İyulun 23 və 24-də Yerdə Günəşdəki tac dəliyinin səbəb olduğu zəif maqnit qasırğaları mümkündür.
Oxu.Az-ın xəbərinə görə, bu barədə Rusiya Elmlər Akademiyası Kosmik Tədqiqatlar İnstitutunun Günəş Astronomiyası Laboratoriyasının və Rusiya Elmlər Akademiyasının Sibir Bölməsinin Günəş-Yer Fizikası İnstitutunun "Telegram" kanalında məlumat verilib.
"Sabah, çərşənbə günü (23 iyul - red.) minimal birinci səviyyəli zəif maqnit qasırğası səviyyəsində pikə çatan nisbətən uzunmüddətli geomaqnit dalğalanmaları mümkündür. Maqnit qasırğaları, həmçinin iyulun 24-də də əhəmiyyətli dərəcədə qalacaq", - deyə hesabatda bildirilib.
Qeyd olunub ki, maqnit qasırğalarının səbəbi hazırda təxminən Günəş-Yer xəttində yerləşən orta ölçülü tac dəliyidir.
"Günəş küləyinin sıxlıq artımının mülayim olacağı gözlənilir, ona görə də güclü geomaqnit qasırğaları ehtimalı azdır. Qasırğaların ikinci və daha yüksək səviyyəyə çatma ehtimalı 6% qiymətləndirilir. Dalğalanmaların ümumi davamlılığı 2 gündən çox olmamalıdır", - deyə hesabatda qeyd olunub.
