"Rusiya və Ukrayna İstanbulda keçirilən üç raund danışıqlarda real nəticələr əldə ediblər".
Teleqraf xəbər verir ki, bunu Rusiya Xarici İşlər Nazirliyinin sözçüsü Mariya Zaxarova keçirdiyi brifinqda deyib.
O bildirib ki, iki ölkə arasındakı münaqişənin həll olunması üçün Kiyev münaqişənin köklü səbəblərini başa düşməlidir:
"Aparılan danışıqların üç raundu əməli tədbirlərlə yadda qaldı. Saxlanılan hərbi əsirlərin mübadiləsi aparıldı, Ukrayna vətəndaşlarının və hərbçilərinin cəsədləri Ukrayna tərəfinə təhvil verildi", - deyə Zaxarova bildirib.
Diplomat qeyd edib ki, Ukraynada baş verənlərin köklü səbəbləri nəzərə alınmaqla və onların hazırkı vəziyyətə gətirib çıxaran hadisələrə, onların nəticələrinə qlobal qiymət verilməsinin zəruriliyi dərk edilməklə həll edilməlidir.
Qeyd edək ki, görüşün yekununda tərəflər təkcə hərbi personalın deyil, mülki şəxslərin də mübadiləsi barədə razılığa gəliblər. Rusiya Ukraynaya siyasi, hərbi və humanitar məsələləri həll etmək üçün üç onlayn işçi qrupu yaratmağı təklif edib. Bundan əlavə, Moskva Kiyevə Ukrayna Silahlı Qüvvələrinin daha 3000 hərbçisinin cəsədini təhvil verməyi, həmçinin yaralıların və ölənlərin cəsədlərinin toplanması üçün cəbhə xəttində qısa humanitar fasilələrə qayıtmağı təklif edib.
