Bakıda küləyin sürəti sarı xəbərdarlığa uyğun olaraq 21 m/s təşkil edir.
Bu barədə Milli Hidrometeorologiya Xidmətindən bildirilib.
"Fevralın 5-i, saat 08:00-a olan məlumatına əsasən, hazırda Bakıda və Abşeron yarımadasında arabir güclənən şimal-qərb küləyi əsir. Küləyin sürəti sarı xəbərdarlığa uyğun olaraq 21 m/s təşkil edir. Axşam saatlarında külək bir qədər mülayimləşsə də, 6-sı səhərdən yenidən güclənəcək.", – məlumatda qeyd olunub.
Mövzu ilə bağlı fikirlərini bölüşən ekoloq Qorxmaz İbrahimli "Sherg.az"a bildirib ki, sarı xəbərdarlıq küləyi zamanı evdən çölə çıxmaq mümkündür, amma ehtiyatla və yalnız zəruri hallarda çıxmaq tövsiyə olunur:
“Bu xəbərdarlıq, küləyin güclü olacağını və müəyyən təhlükələr yarada biləcəyini göstərir. Külək şüşələri, metal və digər yüngül obyektləri hərəkət etdirə bilər ki, bu da insanlar üçün təhlükə ehtimalını artırır. Küləyin güclü olduğu zaman, ağaclardan, yüksək binalardan, asma obyektlərdən uzaq durmaq vacibdir. Həmçinin, avtomobili ağacların altında saxlamaq olmaz. Küləkdə ən təhlükəli yer ağacların olduğu ərazilərdir. Digər tərəfdən məhəllələrdə yaşı keçmiş ağaclardan ehtiyatlı olmaq lazımdır. Təəssüflər olsun ki, Yaşıllaşdırma idarəsi yaşı ötmüş ağacları kəsmir. Ancaq cavan ağacları kəsərək yerində binalar salırlar. Bakı və Abşeron yarımadasında küləyin şiddətinin artması gözlənildiyindən, vətəndaşların ehtiyatlı olmaları və təhlükəsizlik tədbirlərinə riayət etmələri vacibdir. Sarı xəbərdarlıq, küləyin yaradacağı potensial təhlükələrin önlənməsi üçün vaxtında hazırlıq edilməsini tələb edir”.
