Ukrayna Silahlı Qüvvələri Donetsk vilayətinin Seversk istiqamətində Rusiya ordusunun iriçaplı hücumunu dəf edib.
Teleqraf xəbər verir ki, bu barədə "Ukrayinska Pravda" məlumat yayıb.
Bildirilib ki, bu hücum Rusiyanın cəbhənin bu hissəsindəki idarəetmə formatının dəyişməsindən sui-istifadə etmək cəhdi olub.
11-ci Korpusun tərkibində fəaliyyət göstərən 54-cü Əlahiddə Mexanikləşdirilmiş Briqada və 81-ci Aeromobil Briqada koordinasiyalı şəkildə hərəkət edərək Rusiya qoşunlarının hücumunu dəf ediblər. Korpusun mətbuat xidmətindən verilən məlumata görə, əməliyyat nəticəsində 80 nəfər məhv edilib.
Hərbçilərin bildirdiyinə görə, iyulun 25-də saat 12:50-dən 15:00-a qədər düşmən Verxnokamenskoye və Qriqoryevka rayonunda Müdafiə Qüvvələrinin mövqelərinə 27 hücum həyata keçirib. Hücumlarda 150-dən çox piyada, 6 tank, 3 zirehli transportyor, 6 MTLB, BRDM, 12 LAT, 2 baqqi və 41 motosiklet iştirak edib. Nəticədə 80 nəfər məhv edilib, 37-si yaralanıb. Qeyd olunur ki, düşmənin qalan qüvvələri iyulun 26-da davam edən döyüşlərdə də itkilər verməkdədir.
Məlumata görə, Rusiya ordusu mütəmadi olaraq Seversk istiqamətində təzyiq göstərir, vaxtaşırı piyada və texnikanın iştirakı ilə böyük hücumlar həyata keçirir. Rusların bu istiqamətdəki təzyiqi, xüsusilə 2025-ci ilin may-iyun aylarında qonşu Beloqorovka kəndinin itirilməsindən sonra daha da güclənib. Severskin Ukrayna tərəfindən müdafiə olunması rusların şərqdən Slavyansk üzərinə irəliləməsinə mane olur.
İyulun 26-da "Luqansk" Operativ-Taktiki Qoşun Qrupu korpus islahatı çərçivəsində fəaliyyətini dayandıraraq 11-ci Ordu Korpusu formatında davam etdirir. "Ukrayinska Pravda"nın mənbələrindən əldə edilən məlumata görə, Rusiya ordusu cəbhədə idarəetmə formatının dəyişdirilməsi barədə əvvəlcədən məlumatlı idi və bu potensial "zəif nöqtədən" istifadə etməyə cəhd etsə də, buna nail ola bilməyib.
