İsrailin sabiq Baş naziri Naftali Bennet ölkəsinin “çöküşə doğru getdiyini” bəyan edərək, Baş nazir Benyamin Netanyahunun rəhbərlik etdiyi hökumətin mümkün qədər tez dəyişdirilməsinin vacib olduğunu bildirib.
Sherg.az xəbər verir ki, Vaşinqtona səfəri zamanı sosial media hesabında paylaşım edən Bennet, “İsrail hökuməti 7 oktyabrda olduğu kimi bu gün də siyasi və media cəbhəsində tamamilə çökmüş vəziyyətdədir”, – deyə vurğulayıb.
Bennet Netanyahu hökumətindəki nazirlərə də sərt sözlərlə hücum edib: “Nazirlər "Qəzza məhv ediləcək" və "Qəzzaya nüvə bombası" kimi siyasi divident əldə etmək üçün səsləndirdikləri axmaq bəyanatlarla İsrailə böyük zərər vururlar”.
“Sanki vaxt sonsuz imiş kimi müharibənin uzadılması bizə ciddi ziyan vurur”, – deyə Bennet əlavə edib və sözlərinə belə davam edib:
“7 oktyabrdan bu yana demək olar ki, iki il keçib, amma hələ də HƏMAS bizə şərtlər diktə edə bilir – bu necə mümkündür? İsrail üçün əlimdən gələni etməyə davam edəcəyəm. Amma nəticə aydındır: bu fəlakətdən yeganə çıxış yolu, dağıdıcı hökuməti ən qısa zamanda dəyişmək və yeni yola çıxmaqdır.”
