Filippin paytaxtı Manilada keçirilən “Miss Earth 2025” beynəlxalq gözəllik müsabiqəsində Çexiyanı təmsil edən 21 yaşlı Natali Puşkinova (Natalie Puskinova) qalib elan olunub. Marketinq və ictimaiyyətlə əlaqələr ixtisası üzrə təhsil alan gənc tələbə 81 ölkədən olan iştirakçını geridə qoyaraq ilin “Yer kürəsinin gözəli” (Miss Earth) tacını qazanıb.
Bakupost.az xəbər verir ki, “Miss Earth” dünyanın ən nüfuzlu dörd gözəllik müsabiqəsindən biridir. Yarışma 2001-ci ildən bəri hər il ətraf mühitin qorunması, ekoloji maarifləndirmə və davamlı həyat tərzini təşviq etmək məqsədilə keçirilir. Müsabiqənin əsas məqsədi yalnız fiziki gözəlliyi deyil, həm də sosial məsuliyyət və planetin gələcəyi ilə bağlı düşüncələri önə çıxarmaqdır.
Bu ilki tədbir “Gözəllər bir məqsəd uğrunda” (“Beauties for a Cause”) şüarı altında baş tutub. Təşkilatçılar bu mövzunun iqlim böhranı, təbii fəlakətlər və ekoloji balans kimi qlobal çağırışlarla birbaşa əlaqəli olduğunu bildiriblər.
Tacın sahibi olan Natali Puşkinova çıxışında gəncləri ekoloji məsələlərə daha ciddi yanaşmağa və həmrəylik göstərməyə çağırıb: “Dünya dəyişir və biz bu dəyişikliyə məsuliyyətlə yanaşmalıyıq. Mən ümid edirəm ki, bu platforma vasitəsilə daha çox insanı təbiətə qarşı sevgi və qayğıya sövq edə biləcəyik.”
Yarışmanın nəticələrinə əsasən, digər əsas titullar da təqdim edilib:
“Miss Earth Air 2025” – İslandiyadan Soldis İvarsdottir (Soldis Ivarsdottir);
“Miss Earth Water 2025” – Vyetnamdan Trinh Mi Anh (Trinh My Anh);
“Miss Earth Fire 2025” – Tailanddan Vari Nqamxam (Waree Ngamkham).
Filippində 24-cü dəfə təşkil olunan builki müsabiqə bir neçə mərhələdən ibarət olub. İştirakçılar “yaşıl layihələr” təqdim edib, təbiətin mühafizəsinə yönələn sosial təşəbbüslərini izah ediblər. Yarışın final mərhələsi isə möhtəşəm şou və milli geyim nümayişi ilə müşayiət olunub.
“Miss Earth” qalibləri adətən BMT-nin ekoloji proqramları və beynəlxalq iqlim təşəbbüslərində səfir kimi fəaliyyət göstərirlər.
