“Artıq birincisini 2018-ci ildə təşkil etdiyimiz "TEKNOFEST" öz sahəsində brendə çevrilib”.
“Report” xəbər verir ki, bunu aprelin 29-da Türkiyə Prezidenti Rəcəb Tayyib Ərdoğan İstanbulda keçirilən “TEKNOFEST” aerokosmik və texnologiya festivalında çıxışında bildirib.
Türkiyə Prezidenti 2022-ci ildə Bakıda azərbaycanlı gənclərlə "TEKNOFEST" sevincini yaşadıqlarını qeyd edib: “Samsundan Qaziantepədək ölkəmizin müxtəlif şəhərlərində texnologiya, müdafiə sənayesi və elmlə maraqlanan gənclərlə bir araya gəldik”.
Onun sözlərinə görə, müraciət edən komandaların sayı hər il artır: “Bildiyiniz kimi, 2018-ci ildə 4 333 müraciətlə bu hadisəyə bismillah dedik. Bu il 81 vilayət və 96 ölkədən 333 min komandaya, 1 milyon rəqib müraciətinə çatdıq”.
Ərdoğan vurğulayıb ki, müsabiqə kateqoriyalarının sayı 14-dən 41 əsas və 102 alt kateqoriyaya yüksəlib: “İştirakın artması ilə mükafat və təşviqlərimizin məbləği də artıb. Cəmi 4 milyon TL mükafat və dəstək məbləği ilə başlayan proses 44 milyon TL-yə çatıb. İnanıram ki, rekordlar və ilklər festivalı olan TEKNOFEST uğur zolağını daha da yüksəldəcək”.
