“Hər zaman Ermənistanın çirkin əməllərini müdafiə edən Fransa dərhal öz xarici işlər nazirini Ermənistana ezam etdi. O da səfəri öncəsi Türkiyə ərazisində yerləşən Ağrı dağının fotosunu Ermənistan ərazisi kimi təsvir edərək çirkin niyyətini gizlətmədi”. Bunu millət vəkili Vahid Əhmədov deyib. Deputat bildirib ki, səfər zamanı Azərbaycan əleyhinə bir sıra sərsəm açıqlamalar verməklə, öz çirkin niyyətlərini bir daha mümayiş etdirdilər: "Çox düzgün olaraq bu hadisələrin fonunda cənab Prezident İspaniyada keçirilən Aİ-nin toplantısına getməyəcəyini bəyan etdi, bu qərar təbii ki, böyük narahatcılıq yaratdı və Almaniyanın kansleri Olaf Şoltsun zəng etməsi vəziyyətin nə qədər ciddi olmasından xəbər verirdi. Beştərəfli görüş bizim iştirakımız olmadan baş tutsa da, Ermənistanın baş naziri Avropa İttifaqı, Almaniya və Fransanın rəhbərlərinin iştirakı ilə Qranadada Azərbaycanın ərazi bütövlüyünün tanınması barədə rəsmi sənəd-bəyanat imzaladı. Bunun ardınca, Avropa İttifaqı Şurasının prezidenti Şarl Mişel oktyabr ayının sonunda Azərbaycan və Ermənistan prezidentlərinin Brüsseldə görüşünün təşkili barəsində fikir söylədi. Almaniya kansleri Olaf Şolts Azərbaycanın ərazi bütövlüyünü bir daha qeyd edərək BMT missiyasının Qarabağda fəaliyyətini və oradakı vəziyyəti yüksək qiymətləndirdi. Faktiki olaraq, Fransa prezidentinin Qranada görüşündə Azərbaycana qarşı mövqeyi fiaskoya uğradı və Makron Azərbaycana qarşı sanksiyalar yox, danışıqlar yolunu tutmağı təklif etdi. Bəzi siyasətçilər və ekspertlər 19 sentyabrda qazanılmış qələbənin üzərinə kölgə salaraq bu qələbəni yanlış olaraq bəzi dövlətlərlə, xüsusilə İran və Rusiya ilə bölüşməli olduğunu qeyd edirlər. Bu fikir absurddur və qəbuledilməzdir. Bu qələbə başda Ali Baş Komandan olmaqla Azərbaycan Ordusunun və Azərbaycan xalqının layiqli qələbəsidir".
V.Əhmədov hesab edir ki, hazırkı məqamda Azərbaycan əsas üç məsələni tez bir zamanda həll etməlidir: "Bunlar Ermənistan ilə sülh müqaviləsi imzalanması, Rusiya sülhməramlılarının bölgədən tədricən çıxarılması və Xankəndidə idarəetmə və icra orqanlarının fəaliyyətinin təşkil edilməsidir".
