Gün ərzində əlimizdən düşməyən cib telefonları, koronavirus infeksiyasının mənbələri siyahısına başçılıq edə bilər.
e-tibb.az xəbər verir ki, Britaniyanin Sautempton Universitetinin professoru Vilyam Kivil belə bir açıqlama ilə çıxış edib. Onun sözlərinə görə, əlləri istənilən qədər qorusaq, təmiz saxlasaq da, smartfonun ekranına bircə dəfə toxunub əlləri gözlərə, buruna, ağıza toxundurmaqla infeksiya riski yaratmış oluruq.
Xəstə insanlar ətrafda öskürəndə və ya asqıranda viruslar, eləcə də COVID-2019 hissəcikləri olan tüpürcək damcıları müxtəlif səthlərə düşür. Qapı dəstəyi, lift düymələrinə toxunan zaman heç şübhəsiz bir virus hissəciyi tuturuq. Sonra əllərimizi yusaq, dezinfeksiya etsək belə, yenidən cib telefonumuza əl vururuq.
Qeyd olunub ki, koronavirusun telefonlar üzərində nə qədər yaşaya biləcəyi əslində açıq bir sualdır. Amma istənilən virusdan qorunmaq üçün telefonları da tez-tez silmək lazımdır. Bunun üçün alkoqollu salfetlər və gellərdən istifadə etmək ən etibarlı yoldur.
Məlumata görə, əşyaları antiseptik xlorheksidin məhlulu ilə silmək də olar. Bu bir qədər zəif tərkib sayılsa da, bakteriyaları öldürə bilir. Amma onun koronavirusa qarşı effektivliyinə dair heç bir sübut yoxdur. Telfonları silmək üçün ən azı adi nəm salfetdən istifadə etmək olar.
Qeyd edək ki, bir qədər əvvəl ABŞ-da yeni növ koronavirusun hansı səthlərdə daha uzun ömür sürdüyü araşdırılıb.
(Ətraflı bu linkdə: https://e-tibb.az/xeber/koronavirusun-hansi-sethlerde-daha-uzun-yasadigi-melum-olub-1573)
ABŞ-ın Xəstəliklərə Nəzarət və Profilaktika Mərkəzinin direktoru Robert Redfild virusun hansı səthdə daha uzun zaman yaşadığını açıqlayıb. Alimlər bununla bağlı fərqli səthləri öyrəniblər, məlum olub ki, polad və mis üzərində koronavirus təxminən iki saat, kağız və plastik kütlələrdə isə daha uzun zaman həyat sürür.
