Ermənistanın öz rəsmi statistikası 200 mindən çox azərbaycanlının etnik təmizləməyə məruz qaldığını təsdiq edir
"Son bir ayda Qarabağ məsələsini 2 dəfə BMT-nin Təhlükəsizlik Şurasının iclasına çıxaran qüvvələr bu bölgəmizdə, guya, etnik təmizləməyə cəhdlərin olduğunu hər vəclə iddia etməyə çalışırlar. Reallıq təbii ki, başqadır". Bu barədə "Sherg.az"a açıqlamasında millət vəkili Vüqar Bayramov deyib. Deputat bildirib ki, bu fərqli reallığı elə Ermənistan rəsmi statistikası özü təsdiq edir: "Ermənistan Stastika İdarəsinin məlumatına əsasən, bu ölkədə yaşayan azərbaycanlıların sayı 1979-cu ilin siyahıya alınmasında 160 min 841 nəfər olsa da, 2011-ci ilin siyahıya almasında 1 nəfər azərbaycanlı belə qeydiyyata düşməyib. Ermənistanın 30 il ərzində işğal altında saxladığı Qarabağda yaşayan azərbaycanlıların sayına diqqət yetirək. Keçmiş SSRİ-də 1989-cu ildə həyata keçirilən siyahıyaalınmaya əsasən, bu bölgəmizdə yaşayan azərbaycanlıların sayı 40 min 688 nəfər olub. 2011-ci il siyahıya almasında 1 nəfər azərbaycanlı belə qeydiyyata düşməyib. Ermənistanın özünün elan etdiyi rəsmi statistikaya istinad etsək, 1989-cu ildən sonra Ermənistan və Azərbaycanın Qarabağ bölgəsində etnik təmizləməyə məruz qalan azərbaycanlıların sayı 201 min 529 nəfər olub. Doğrudur, reallıqda daha çox azərbaycanlı etnik təmizləməyə məruz qalıb. Amma hətta Ermənistanın öz rəsmi statistikası 200 mindən çox azərbaycanlının etnik təmizləməyə məruz qaldığını təsdiq edir. Real mənzərə budur. Əlavə şərhə ehtiyac varmı?".
