İyulun 5-də Suriyada Rusiya-Suriya hərbi təlimləri başlayacaq.
Bu barədə brifinqdə kontr-admiral Oleq Qurinov bildirib.
“İyulun 5-dən Suriyada 6 gün davam edəcək Rusiya-Suriya birgə təlimləri başlayır. Təlimlər zamanı aviasiya, hava hücumundan müdafiə qüvvələri və vasitələrinin, hava hücumlarının dəf edilməsində radioelektron müharibənin birgə hərəkəti məsələlərinin işlənməsi planlaşdırılır”, - deyə kontr-admiral vurğulayıb.
İki ölkə arasında güc nümayişi məsələsinin bitmədiyini söyləyən hərbi-siyasi ekspert Həşim Səhrablı "Sherg.az"a qeyd edib ki, Suriyada istər Rusiya, istərsə də Əsəd qüvvələri tərəfindən aparılan əməliyyatlar hər zaman kimlərəsə gözdağı məqsədi daşıyıb:
"Əslində bu uğurlu da sayıla bilər. Çünki Bəşər Əsədə qarşı kütləvi xalq hərəkatının yaşanması, həmçinin Qərbin dəstəyi ilə insanların silahlanaraq məsələnin vətəndaş müharibəsinə dönüşməsi şəraitində, o hələ də hakimiyyətdədirsə, deməli uğur əldə olunub. Biz şahid olduq ki, nə Hüsnü Mübarək, nə də Müəmmar Qəddafi öz iqtidarlarını qoruya bilmədi. Ancaq Bəşər Əsəd hələ də gücünü göstərir və Rusiyanın dəstəyi ilə əməliyyatlar aparır".
Ekspertin sözlərinə görə, indiki təlimlər həm əvvəlki hadisələrin davamı, həm də yeni mərhələsidir:
"Rusiya Ukraynada ciddi uğursuzluqlar yaşayır, Cənubi Qafqazdakı Qarabağ kartı artıq çalışmır və dünyanın bir sıra ölkələrində ciddi maraq itgiləri ilə üzləşir. Amma bunun qarşılığında Afrika ölkələrində Kremlin maraqları müəyyən qədər güclənir. Suriyada isə Rusiya əsas faktorlardan biridir. Bu nöqtədə deyə bilərik ki, rəsmi Moskva maraqlarını müdafiə etmək üçün, harda daha güclüdürsə, bunu itirməməyə çalışır. Digər tərəfdən son proseslər onu göstərir ki, artıq Suriyada yekun bir ortaq məxrəcə gəlmək üçün həm Qərb, həm Türkiyə, həm də Rusiya tərəfindən müxtəlif addımlar atılır. Məhz bu istəklərin fonunda indi Moskva istəyir ki, öz gücünü maksimum nümayiş etdirsin. Əsəd isə masada göstərdiyi gücə görə söz sahibi olmağa və qazanclı çıxmağa çalışır".
