İYİ Partiyanın sədri Müsavat Dərvişoğlu Türk Ocaqları Mərkəzini ziyarət edib. Türk Ocaqlarının sədri, professor Mehmet Öz ilə görüşən Dervişoğlu görüşdən sonra jurnalistlərin suallarını cavablandırıb.
"Sherg.az"ın xəbərinə görə, İYİ Partiya sədri Dərvişoğlu görüşlə bağlı jurnalistlərə açıqlamasında bunları deyib:
"Bu gün çox əhəmiyyətli bir ziyarəti reallaşdırdıq. Gəncliyimizdə ilham və feyz aldığımız yerlərdən biri də Türk Ocaqlarıdır. Bu gün burada olmaqdan çox məmnun olduğumu bildirmək istəyirəm. Hörmətli Mehmet bəylə bölgə, dünya və Türkiyəyə dair fikirlərimizi paylaşdıq. Arzu və ümid edirəm ki, buradakı fikir qığılcımı türk dünyasına yayılsın. Bu Ocaq Cümhuriyyətin qurulmasına öncülük edən və rəhbərlik edən ideyaların yarandığı yerdir. Bu gün də Cümhuriyyəti qorumaq baxımından çox mühüm bir missiyanı təmsil edəcəyi göz qabağındadır. Xoş qəbula və nümayəndə heyətimizə göstərilən diqqətə görə, təşəkkürümü bildirirəm".
İYİ Partiya sədri əlavə edib ki, Türkiyənin birliyə və həmrəyliyə ehtiyacı var:
"Türkiyə unitar dövlət quruluşunu qorumalıdır. Türk millətini millət edən dəyərləri qorumaq lazımdır. Bu yer həm də düşüncə yeridir. Bu baxımdan həm yaşamalı, həm yaşatmalı, həm də fikirlərinə hörmət edilməli bir qurumdur. Mən də gəncliyimdən həmişə bu hisslə böyümüşəm”.
Dərvişoğlu Cümhuriyyət bayramında Anıtkabirdə təşkil edilən mərasimdə MHP sədri Dövlət Baxçalı ilə görüşü barədə sualı belə cavablandırıb:
"Hörmətli Baxçalı ilə hər zaman əl sıxışıram. Görüşlərə qarşı deyiləm. Bununla həm də "əl uzatmaq" anlayışı ilə bağlı aparılan müzakirələrə diqqət çəkdim. Süleyman Dəmirəllə Bülent Ecevit arasında da belə hadisə yaşanmışdı. Dəmirəl bəy Anıtkabirdə olarkən Ecevitin əlini sıxanda jurnalistlər ondan bu barədə soruşmuşdular. Cavab vermişdi ki, "onun harasını sıxacağam?". İndi məni də belə cavab verməyə məcbur etməsinlər".
