- Bakı regional sabitlik və milli maraqlar xəttini prioritet olaraq saxlayacağını nümayiş etdirir
Bizim üçün yeganə risk Azərbaycanı müəyyən avantüralara cəlb etmək cəhdləridir. Keçmişdə də belə olmuşdur. Keçmişdə bu, siyasi xarakter daşıyırdı. Biz bunun öhdəsindən uğurla gəldik.
Bu fikirləri Prezident İlham Əliyev IV Şuşa Qlobal Media Forumunda səsləndirib.
Dövlət başçısı deyib ki, bu gün isə bu avantüralar daha ciddi və təhdidedici xarakter daşıyır. Ona görə də özümüzü müdafiə etməyə, konsolidasiya edilmiş müəyyən dairələrlə mübarizə aparmağa öyrəşmişik.
Azərbaycan Prezidenti İlham Əliyevin səsləndirdiyi bu fikirlər mövcud geosiyasi reallıqlar fonunda ölkənin qarşılaşdığı çağırışların mahiyyətini ortaya qoyur. Son illər Cənubi Qafqazda formalaşan yeni siyasi konfiqurasiya Azərbaycanın regional təsir imkanlarını əhəmiyyətli dərəcədə artırıb. Bu isə ölkəni təkcə əməkdaşlıq layihələrinin deyil, eyni zamanda müxtəlif güc mərkəzlərinin rəqabətinin də diqqət mərkəzinə çevirib.
Azərbaycanın əsas marağı regionda sabitliyin və təhlükəsizliyin qorunması, iqtisadi inkişafın davam etdirilməsi və nəqliyyat-kommunikasiya layihələrinin genişləndirilməsidir. Bakı bu məqsədlə balanslaşdırılmış xarici siyasət kursu yürüdərək həm Qərb, həm də Şərq istiqamətində qarşılıqlı faydalı əməkdaşlıq modelini formalaşdırmağa çalışır. Məhz bu siyasət Azərbaycanın hər hansı geosiyasi bloklaşmanın və ya qarşıdurmanın iştirakçısına çevrilməsinin qarşısını alır.
Hazırkı beynəlxalq şəraitdə müxtəlif regional və qlobal aktorlar Cənubi Qafqazı öz maraqları prizmasından formalaşdırmağa çalışırlar. Belə bir şəraitdə Azərbaycanın hansısa qarşıdurmaya cəlb olunması cəhdləri ölkənin milli təhlükəsizlik maraqlarına ziddir. Prezidentin vurğuladığı “avantüralar” ifadəsi də məhz Azərbaycanın strateji seçimlərinə təsir göstərmək, onu müəyyən geosiyasi layihələrin alətinə çevirmək istəyən dairələrə mesaj kimi qiymətləndirilməlidir.
Azərbaycanın son illərdə nümayiş etdirdiyi siyasət göstərir ki, rəsmi Bakı risklərin idarə olunması sahəsində mühüm təcrübə qazanıb. Ölkə həm enerji təhlükəsizliyi, həm nəqliyyat-logistika marşrutları, həm də regional vasitəçilik təşəbbüsləri vasitəsilə öz strateji əhəmiyyətini artırıb. Bu səbəbdən Azərbaycanın maraqları hər hansı xarici qüvvənin geosiyasi planlarında iştirak etməkdən deyil, müstəqil qərarvermə imkanlarını qorumaqdan və milli maraqlara əsaslanan siyasəti davam etdirməkdən keçir.
Mövcud şəraitdə Bakı üçün ən vacib vəzifə regional gərginliklərin ölkənin inkişaf gündəliyinə təsir göstərməsinin qarşısını almaqdır. Azərbaycanın əldə etdiyi siyasi və iqtisadi nailiyyətlər göstərir ki, ölkənin gücü məhz balanslı siyasətində, milli həmrəyliyində və xarici təzyiqlər qarşısında müstəqil mövqeyini qorumaq qabiliyyətindədir. Prezident İlham Əliyevin Şuşadan verdiyi mesaj da Azərbaycanın bundan sonra da heç bir geosiyasi avantüraya qoşulmayacağını, regional sabitlik və milli maraqlar xəttini prioritet olaraq saxlayacağını nümayiş etdirir.
