Ermənistan Təhlükəsizlik Şurasının katibi Armen Qriqoryan iyulun 4-də ABŞ-ə gedəcək. Məlumatı şura yayıb.
Vurğulanıb ki, səfər çərçivəsində A.Qriqoryan ABŞ Prezidenti Cozef Baydenin köməkçisi və milli təhlükəsizlik üzrə müşaviri Ceyk Sallivan və başqa yüksək vəzifəli rəsmilərlə görüşəcək.
Hadisələrə xronoloji baxmaq lazım olduğunu deyən siyasi şərhçi Asif Nərimanlı "Sherg.az"a bildirib ki, Azərbaycan və Ermənistan XİN rəhbərlərinin Vaşinqtonda keçirilən görüşündən sonra belə bir səfərin olması maraqlı vəziyyətdir:
"Vaşinqton görüşündə əsas prioritet sərhədlərin delimitasiyası, Qarabağdakı erməni əhalisinin təhlükəsizliyi və qanunsuz birləşmələrin çıxarılması olub. Digər tərəfdən ortada bəzi fikir ayrılıqlarının olduğu bildirildi. Məhz bu görüşdən sonra isə İrəvanda Ermənistan təhlükəsizlik Şurasının iclası keçirildi. Qriqoryanın ABŞ səfəri də Vaşinqton görüşü ilə bağlı olan məsələdir. Yəni razılaşdırılan və razılaşdırılmayan məsələlərin müzakirəsi gözləniləndir”.
Analitik qeyd edib ki, ABŞ Vaşinqton görüşündədə iki məsələni əsas götürmüşdü:
“Bunlar Qarbağdakı erməni əhalisi ilə Bakının təmasları və qanunsuz silahlıların çıxarılmasıdır. Düşünürəm ki, Qarabağdakı qanunsuz birləşmələrin çıxarılması məsələsi artıq qəbul olunub. Çünki əgər dialoq gedir və Qarabağda Azərbaycanın bir hissəsi kimi tanınırsa, orada erməni qoşunları olmamalıdır. Qriqoryanın görüşdən sonra ABŞ-ə getməsi də atılacaq addımlarla bağlı ola bilər. Ancaq maraqlıdır ki, niyə Azərbaycan tərəfindən kimsə yox, məhz Qriqoryan dəvət edilib? Görünür Amerika Ermənistanın icra etməli olduğu və boyun qaçırdığı məsələləri gündəmə gətirəcək. Çünki rəsmi Vaşinqton tezliklə sülhün əldə edilməsinə çalışır. Hətta yaxın zamanlarda Blinken ilkin razılaşmaların ola biləcəyini vurğuladı. Yəni ABŞ qarşıdakı aylarda sülhün bərqərar olmasına tələsir".
