Eyni problemlərdən əziyyət çəkən dövlətlər əsasən bir-birini oxşar mövzularda dəstəkləyirlər
Gürcüstanın sabiq prezidenti Mixail Saakaşvili Qarabağdakı separatçı rejimin “dövlət naziri” vəzifəsində çalışmış Ruben Vardanyanın həbsini alqışlayıb.
Bu barədə mətn hazırda həbsdə olan M.Saakaşvilinin rəsmi “X” sosial şəbəkə hesabında dərc edilib.
“Hazırda xeyirlə şər arasında mübarizə gedir. Azərbaycan Ukraynada müharibəyə fəal dəstək verən Ruben Vardanyanı, eləcə də “Abxaziya” və “Cənubi Osetiya” ilə əlaqələri inkişaf etdirən və qondarma qurumun keçmiş “xarici işlər naziri” David Babayanı həbs edib”, - M.Saakaşvili qeyd edib.
Məlumat üçün əlavə edək ki, Azərbaycan Respublikası Cinayət Məcəlləsinin müvafiq maddələri ilə ittiham edilən Ruben Vardanyan və David Babayan Dövlət Təhlükəsizliyi Xidmətinin istintaq təcridxanasında saxlanılır. Hazırda cinayət işləri üzrə zəruri və təxirəsalınmaz istintaq-əməliyyat tədbirləri davam etdirilir.
Mövzu ilə bağlı “Sherg.az”a danışan siyasi şərhçi Elmir Səftərov söyləyib ki, dünya ölkələrinin siyasi gedişatılarına nəzər saldıqda görmək olar ki, eyni problemlərdən əziyyət çəkən dövlətlər əsasən bir-birini oxşar mövzularda dəstəkləyirlər:
“Buraya separatçılıağla mübarizə, ərazi bütövlüyünün tanınması məsələləri də daxildir. Gürcüstan kimi Azərbaycan da separatizmdən əziyyət çəkib. Amma Azərbaycan öz suverenliyini bərpa edərək, ərazisindəki separatizmi məhv etdi. Lakin Gürcüstanda hazırda da Abxaziya və Cənubi Osetiya məsələləri problem olaraq qalmaqdadır. Bu da Gürcüstanın ərazi bütövlüyünə zidd olaraq prosesləri onların əleyhinə aparan amillərdəndir ki, həlli qəliz görünür. Ona görə də Mixail Saakaşvilinin separatçı rejimin "dövlət naziri" vəzifəsində çalışmış Ruben Vardanyanın və digərlərinin həbsini alqışlaması təəccüblü deyil”.
Analitik qeyd edib ki, terrorçuluğu maliyyələşdirən, ərazilərimizdə qanunsuz fəaliyyətlə məşğul olmuş Ruben Vardanyanın sərbəst buraxılması üçün ölkəmizə qarşı təzyiqlər edilməsi fonunda Mixail Saakaşvilinin fikirləri müsbət addım kimi dəyərləndirilməlidir:
“Buna baxmayaraq, ölkəmizə qarşı həyata keçirilən təzyiqlərin heç bir hüquqi əsası yoxdur. Hazırda ərazilərimizdə terrorçuların tərksilah edilməsi prosesi davam edir. Eyni zamanda, Azərbaycan axtarışa verdiyi şəxslərin həbsini də həyata keçirir. Lokal xarakterli antiterror tədbirlərindən bu günə kimi saxlanılan erməni cinayətkarların cəzası qanunla müəyyən ediləcək”.
