Rusiyanın mövqelərinə edilən hücumların dəqiq vaxtına artıq “özləri” qərar verirlər
Ukrayna müharibəsi dron texnologiyasının müasir dövrdə müharibə formasını necə dəyişdirə biləcəyini göstərməyə davam edir.
Sherg.az xəbər verir ki, FPV kamikadze dronlardan əlavə, dənizdə də pilotsuz su vasitələri (PSV) və avtonom sistemlərin istifadəsi mühüm yenilik yaratdığı halda, ABŞ mətbuatı dronların artıq süni intellektlə dəstəkləndiyini bildirib.
"Wall Street Journal"ın (WSJ) məlumatına görə, Ukrayna tərəfindən istifadə olunan süni intellekt dəstəkli dronlar son günlərdə Rusiyanın mövqelərinə edilən hücumların dəqiq vaxtına artıq “özləri” qərar verirlər.
Çoxsaylı istifadə olunduqda “sürü” formasında hədəfə yönələ biləcəkləri, həmçinin bir-birləri ilə əlaqə qura bildikləri və operatorlardan asılı olmayaraq qərar qəbul etdikləri vurğulanır.
Ukraynanın "Swarmer'' şirkətinin rəhbəri Sergi Kuprienko bildirib ki, hədəf müəyyənləşdirildikdən sonra qalan bütün prosesi dronlar idarə edir və bir operator təkbaşına çox sayda dronu nəzarətdə saxlaya bilir.
Lakin süni intellektin etik baxımdan yarada biləcəyi problemlər döyüş meydanı üçün də keçərlidir.
Dronların mülki şəxslərin və hərbçilərin həyatları üzərində tamamilə həlledici hala gəlməsi, etik cəhətdən olduqca mürəkkəb görünür.
ABŞ-nin Pilotsuz Donanma Layihəsi
"Reuters"in xəbərinə görə, ABŞ Hərbi Dəniz Qüvvələri dronlardan ibarət bir dəniz donanması yaradır.
ABŞ tərəfindən hazırlanmaqda olan avtonom su vasitələrinin sınaqlarında baş verən qəzaları önə çəkən "Reuters", ABŞ hərbi rəsmilərinin Çini çəkindirmək üçün avtonom sistemlərə investisiya etməyə başladığını yazıb.
Pentaqon 2023-cü ildə ''Replicator'' proqramı çərçivəsində dron və avtonom sistemlərin inkişafı üçün 1 milyard dollar ayırmışdı.
Dəniz əməliyyatları rəhbəri Cim Kilbi “pilotsuz” sistemlərin əhəmiyyətini vurğulayaraq belə demişdi: “Bu sistemlər donanmanın fəaliyyət radiusunu, situasiya barədə məlumatlılığını artıraraq və döyüş qabiliyyətini yüksəldərək gələcəkdə dəniz müharibələrində böyük rol oynayacaq.”
ABŞ Prezidenti Donald Tramp da ABŞ Hərbi Akademiyası West Pointin buraxılış mərasimində çıxış edərək, dron sistemlərinin müasir müharibələrdə çox mühüm olduğunu bildirib və belə deyib:
“Bu gün başqa bir müharibə forması var. Dronları ortaya çıxardılar. Dron bir az fərqlidir...”
